Baramati Assembly constituency: राष्ट्रवादी काँग्रेस शरद पवार पक्षाने विधानसभेसाठीची पहिली यादी जाहीर केली. या यादीत बारामतीमधून अजित पवारांच्या विरोधात युगेंद्र पवार यांना उभे करण्यात आले आहे.
2019 च्या विधानसभा निवडणुकीत अजित पवारांना बारामतीत मोठ लीड होत आता त्यांचा पराभव शक्य वाटतो का? असा प्रश्न जयंत पाटील यांना विचारला असता ते म्हणाले, ‘निवडणुकीत उभा राहिलेला प्रत्येक माणूस जिंकूही शकतो आणि पराभूत ही होऊ शकतो. मी जर असं म्हटलं मी पराभूत होणारच नाही तर ते जनता जनार्दनाच्या हातात आहे. त्याच्यावर आता भविष्यवाणी करणे योग्य नाही. त्या-त्या भागातील जनतेचे काय अनुभव आहेत त्यावर मतदान होत असतं. त्यामुळे याला पाडतो, त्याला पडतो असली भाषा आम्ही करणे योग्य नाही. त्या भागातील जनतेचा तो निर्णय असतो त्यामुळे आम्ही आमचा उमेदवार उभा करण्याचं काम केलं आहे.
तर, आम्ही उभा केलेला उमेदवार अतिशय चांगला आहे, सालस आहे, स्ट्रेट फॉरवर्ड आहे, शिकलेला आहे, अतिशय जबाबदार पद्धतीने वागणारा आहे. त्यामुळे एक नवा नेता नवा चेहरा त्या मतदारसंघात पवार साहेबांच्या आशीर्वादाने पुढे आलेला आहे. लोकसभेची परिस्थिती, निवडणुकीत सुप्रिया ताईंना मिळालेले मत पाहता त्या मतदारसंघात युगेंद्र पवार यांना प्रयत्न करण्यास बराच स्कोप असल्याचं जयंत पाटील म्हणाले आहेत. इतकंच नाही तर फक्त बारामतीच नाही तर आत्ता जे 45 मतदार संघ जाहीर केले ते सगळे जिंकण्यासाठीच लढत असल्याचं देखील जयंत पाटील म्हणाले.
दरम्यान, विधानसभा निवडणुकीसाठी महायुती आणि महाविकास आघाडीतील सर्व प्रमुख पक्षांनी त्यांची पहिली यादी जाहीर केली आहे. निवडणुकीसाठी अर्ज दाखल करण्याचा शेवटचा दिवस २९ ऑक्टोबर असल्याने उर्वरीत यादी कधी जाहीर होते याची उत्सुकता लागली आहे.