Varora Vidhan Sabha Politics: चंद्रपूर जिल्ह्यातील सहा विधानसभा मतदारसंघाच्या जागेसाठी आज १२१ अर्ज दाखल झाले आहेत. यातील एका नावाची चर्चा रंगली आहे. ते नाव म्हणजे प्रवीण सुरेश काकडे. यांची ओळख म्हणजे हे खासदार प्रतिभा धानोरकर यांचे भाऊ. वरोरा विधानसभा मतदारसंघातून त्यांनी आज नामांकन अर्ज दाखल केला आहे, तेही काँग्रेस पक्षाच्या नावाने. आपल्याला ही जागा मिळावी अशी उद्धव ठाकरेंच्या शिवसैनिकांची आग्रही मागणी आहे. या जागेचा तिढा अद्याप सुटलेला नाही.
खासदार धानोरकर या काँग्रेसच्या काही कार्यकर्त्यांना सोबत घेऊन आमदार किशोर जोरगेवार यांना मविआतील राष्ट्रवादी काँग्रेसकडून (शरद पवार गट) तिकीट मिळू नये यासाठी आटापिटा करीत आहेत. तर इकडे भावाने मोठी कामगिरी केली आहे. काँग्रेसवर घराणेशाहीची सातत्याने टीका केली जाते. आता त्यांच्या भावानेच पक्षांच्या वरिष्ठ नेत्यांची परवानगी नसताना काँग्रेसच्या नावाने अर्ज दाखल केल्याने दिल्लीतील घराणेशाही चंद्रपुरात हातपाय पसरू लागल्याची राजकीय वर्तुळात चर्चा रंगली आहे.
शिवसैनिक आक्रमक
वरोरा विधानसभा सध्या काँग्रेसकडे आहे. या विधानसभा क्षेत्रातून दिवंगत बाळू धानोरकर आणि त्यांच्या पत्नी प्रतिभा धानोरकर आमदार राहिल्या आहेत. बाळू धानोरकर शिवसेनेच्या तिकिटावर तर प्रतिभा धानोरकर काँग्रेसच्या तिकीटावर येथून विजय मिळविला होता. ही जागा शिवसेनेच्या (ठाकरे गट) वाट्याला यावी , ही मागणी घेऊन शिवसैनिक आक्रमक झाल्याचे दिसत आहे. उद्धव ठाकरे यांच्याकडे आपल्या भावना शिवसैनिकांनी पोहचविल्या आहेत. या जागेचा निर्णय अद्याप झालेला नाही.
सहा जागांचे मालक आम्हीच
लोकसभा निवडणुकीचा निकाल लागला अन् काँग्रेसने सहा जागांवर आपला अधिकार सांगण्यास सुरुवात केली. वरोरा आणि बल्हारपूर विधानसभा जागेसाठी शिवसैनिक आग्रही आहेत. चंद्रपूर विधानसभेची जागा राष्ट्रवादी काँग्रेसला (शरद पवार ) मिळाली तर आमदार किशोर जोरगेवार तुतारी हातात घेण्याची चर्चा आहे. मात्र काँग्रेस एकही जागा सोडायला तयार नाही. लोकसभेप्रमाणे विधानसभेतील सहा जागा आम्ही जिंकू असा विश्वास काँग्रेसला आहे.
कुणी भरला आज अर्ज
राजुरा विधानसभा मतदारसंघात सुभाष रामचंद्र धोटे (भारतीय राष्ट्रीय काँग्रेस), वामनराव सदाशिव चटप (स्वतंत्र भारत पक्ष), ब्रम्हपुरी विधानसभा मतदारसंघात विजय नामदेवराव वडेट्टीवार (भारतीय राष्ट्रीय काँग्रेस), चिमूर विधानसभा मतदारसंघात किर्तीकुमार भांगडीया (भारतीय जनता पार्टी), सतीश वारजुकर (भारतीय राष्ट्रीय काँग्रेस), वरोरा विधानसभा मतदारसंघात प्रवीण सुरेश काकडे (भारतीय राष्ट्रीय काँग्रेस) यांचासह ११५ इच्छुकांनी नामांकन अर्ज दाखल केले आहेत.