Solapur Vidhan Sabha Mahayuti Controversy: सोलापूर शहर मध्य विधानसभा मतदारसंघ हा शिवसेनेचा पारंपरिक मतदारसंघ आहे, तो मतदारसंघही भाजप एकनाथ शिंदेच्या शिवसेनेकडून हिसकावून घेत असेल आणि सांगोला व्यतिरिक्त कोणतीही जागा शिवसेनेला सुटणार नसेल तर आम्ही भाजपच्या उमेदवाराविरोधात प्रचार करणार असल्याचा इशारा देण्यात आला आहे.
सोलापूर शहर मध्यच्या जागेवरून मिठाचा खडा
सोलापूर शहर मध्यच्या जागेवरून एकनाथ शिंदेच्या शिवसेनेत आणि भाजपमध्ये रस्सीखेच सुरू आहे. सोलापूर शहर मध्यवर शिवसेनेचा प्रभाव राहिला आहे. शिवसेना(फुटण्याअगोदर) आणि भाजप यांच्या युती काळात ही जागा शिवसेनेकडे होती. मागील निवडणुकीचा इतिहास पाहिला असता मध्य विधानसभा मतदारसंघात शिवसेनेच्या आमदाराचा विजय झाला होता. तसेच २०१४ साली शिवसेनेच्या उमेदवाराने स्वतंत्र निवडणूक लढवत भाजपपेक्षा जास्त मते घेतली होती, असे जिल्हाध्यक्ष अमोल शिंदे म्हणाले आहेत. सोलापूर शहर मध्यच्या जागेसाठी भाजपचे पदाधिकारी मुंबईत जोर लावत आहेत. सोलापूर शहर आणि जिल्ह्यात शिवसेनेला फक्त सांगोला या एकाच मतदारसंघापुरता मर्यादित ठेवणार का? असा सवाल उपस्थित केला आहे.
एवढेच नाहीतर एकनाथ शिंदेच्या शिवसेनेला सोलापुरात फक्त एक जागा किंवा शून्य जागा मिळत असतील तर आम्ही भाजपविरोधात काम करणार अशी संतप्त प्रतिक्रिया अमोल शिंदेंनी दिली आहे. त्यामुळे सोलापूर शहर मध्यच्या जागेवरून शिवसेना आणि भाजपमध्ये वाद उफाळण्याची शक्यता आहे.
अन्यथा भाजप विरोधात काम करणार
जिल्हाध्यक्ष अमोल शिंदेंनी भाजप नेत्यांवर टीका करत विधानसभा निवडणुकीत भाजपला धक्का देण्याची तयारी दर्शवली आहे. भारतीय जनता पार्टी शिवसेनेची हक्काची जागा हिसकावून घेत असेल तर भाजप उमेदवारा विरोधात काम करणार आणि पाडापाडीचे राजकारण करणार असा इशाराच दिला आहे.