Udesing Padvi allegaton on Rajendra Kumar Gavit: गेल्याच महिन्यात भाजपाला सोडचिठ्ठी दिलेल्या राजेंद्रकुमार गावित यांना शहादा मतदारसंघातून काँग्रेसची उमेदवारी देण्यात आली आहे. यामुळे महाविकास आघाडीत बिघाडी झाल्याचे चित्र दिसून येत आहे. यासाठी काँग्रेसचे ज्येष्ठ नेते ॲड. के.सी.पाडवी यांनी तब्बल तीन कोटी रुपये रक्कम घेतल्याचा खळबळजनक आरोप माजी आमदार उदेसिंग पाडवी यांनी केला आहे.
भाजपा प्रदेश उपाध्यक्ष राजेंद्रकुमार गावित यांनी महिनाभरापूर्वी भाजपला रामराम ठोकत काँग्रेस पक्षात प्रवेश केला. त्यांना आता काँग्रेसकडून उमेदवारीही जाहीर करण्यात आली. काँग्रेस पक्षश्रेष्ठींच्या या निर्णयावर पक्षातील पदाधिकारी कार्यकर्ते यांनी ताशेरे ओढले आहेत. या निर्णयाविरोधात शहादा-विधानसभेसाठी महाआघाडीच्या इच्छुक उमेदवारांनी एकत्रितपणे वज्रमूठ आवळली आहे आणि पक्षनेतृत्वाला उमेदवार बदलण्याची विनंती केली आहे. असे न झाल्यास याचे पडसाद जिल्ह्यातील काँग्रेसच्या चारही जागांवर होणार असल्याचा इशारा देखील मविआच्या नेत्यांनी दिला.
स्थानिक काँग्रेसच्या नेत्यांनी तसेच महाविकास आघाडीच्या नेत्यांनी भाजपकडून आणलेल्या उपऱ्या उमेदवाराला आम्ही मदत करणार नाही. असा कठोर पवित्रा अवलंबल्याने मतदारसंघातील राजकारण नेमकं कोणतं वळण घेणार याकडे सर्वांचे लक्ष लागले आहे. दरम्यान माजी आदिवासी विकास मंत्री तथा काँग्रेसचे विद्यमान आमदार ॲड. के.सी.पाडवी यांनी राजेंद्रकुमार गावित यांना एबी फॉर्म मिळवून देण्यासाठी त्यांच्याकडून तीन कोटी रुपयांची रक्कम घेतल्याचा धक्कादायक आरोप माजी आमदार उदेसिंग पाडवी यांनी केला आहे. त्यामुळे त्यांच्या आरोपांनंतर एकच खळबळ उडाली आहे.