Maharashtra Election 2024: पुण्यातील कसभा पेठ मतदारसंघातून मनसेने गणेश भोकरे यांना उमेदवारी जाहीर केली आहे. यामुळे या मतदारसंघात काँग्रेस विरुद्ध भाजप या लढतीत आता मनसेचा देखील समावेश झाला आहे.
राज ठाकरे यांनी पुण्यातील सर्वात चर्चेत असलेल्या कसबा पेठ या मतदारसंघातून गणेश भोकरे यांना उमेदवारी दिली आहे. कसबा पेठ मतदारसंघ हा २०२३ मध्ये झालेल्या पोटनिवडणुकीपासून संपूर्ण राज्यात चर्चेत आहे. भाजपचा बालेकिल्ला असलेल्या हा मतदारसंघ आता काँग्रेसच्या ताब्यात आहे. पोटनिवडणुकीत रवींद्र धंगेकर यांनी भाजपच्या हेमंत रासनेंचा पराभव केला होता. आता काँग्रेसने पुन्हा एकदा धंगेकर यांना उमेदवारी दिली आहे. काँग्रेसने उमेदवारी जाहीर केल्यानंतर आता मनसेने या मतदारसंघातून उमेदवार जाहीर करत भाजपला धक्का दिला आहे. कारण भाजपने अद्याप या मतदारसंघातील उमेदवार जाहीर केलेला नाही.
विधानसभा निवडणुकीची घोषणा झाल्यावर या मतदारसंघातून ब्राह्मण उमेदवाराला संधी द्यावी अशी मागणी करणारे पत्र ब्राह्मण संघटनेने दिले होते. कसबा पेठमधून भाजपकडून हेमंत रासने आणि धीरज घाटे हे दोघे इच्छुक आहेत. भाजपचा उमेदवार ठरण्याआधी मनसेने कसबामधून उमेदवारी जाहीर करत भाजपला एक प्रकारे धक्का दिला आहे. गणेश भोकरे मैदानात उतरल्याने या मतदारसंघातील चुरस आणखी वाढणार आहे. सोबत ब्राह्मण मतदार अधिक असलेल्या कसबामध्ये भाजप कोणता उमेदवार देते यावर त्यांच्या विजयाची गणिते ठरणार आहेत.
अशी आहे मनसेची चौथी यादी
कसबा पेठ- गणेश भोकरे
चिखली- गणेश वरवडे
कोल्हापूर उत्तर- अभिजीत राऊत
केज- रमेश गालफाडे
कलिना- संदीप उर्फ बाळकृष्ण हुटगी
मनसेच्या उमेदवारांमधील यावेळीचे सर्वात मोठे नाव म्हणजे अमित ठाकरे हे होय. राज ठाकरे यांचे पुत्र अमित यांना माहीम विधानसभा मतदारसंघातून उमेदवारी देण्यात आली आहे. सध्या हा मतदारसंघ शिवसेना एकनाथ शिंदे गटाकडे आहे. सदा सरवणकर हे विद्यमान आमदार असून शिवसेना ठाकरे गटाकडून महेश सावंत यांना उमेदवारी देण्यात आली आहे.