Meghna Bordikar Wealth : जिंतूर विधानसभा मतदारसंघातून भारतीय जनता पक्षाच्या वतीने निवडणूक लढणाऱ्या आमदार मेघना बोर्डीकर यांनी निवडणूक आयोगाला दिलेल्या शपथपत्रानुसार त्यांचे एक कोटी सत्तर लाख रुपयाचे वार्षिक उत्पन्न आहे. आमदार मेघना बोर्डीकर या शेती आणि व्यवसायाच्या माध्यमातून हे उत्पन्न कमवतात.
जिंतूर सेलू विधानसभेच्या आमदार मेघना बोर्डीकर यांनी दुसऱ्यांदा भाजप पक्षाकडून उमेदवारीचं गिफ्ट मिळालं आहे. बोर्डीकर यांनी आपले बीएससीचे शिक्षण ज्ञानोपासक कॉलेज परभणी येथून पूर्ण केले आहे. सन २००० मध्ये त्यांचे बीएससीचे शिक्षण पूर्ण झाले असून त्यांनी आपल्या आमदारकीच्या कार्यकाळामध्ये अजिंक्य डी वाय पाटील विद्यापीठ पुणे येथून मास्टर ऑफ आर्ट इंटरनॅशनल स्टडीजची डिग्री देखील घेतली आहे. तर मेघना बोर्डीकर यांचे पती दीपक साकोरे हे पोलीस दलात अधिकारी पदावर आहेत.
आमदार मेघना बोर्डीकर यांनी शपथपत्रात दिलेल्या संपत्तीच्या विवरणानुसार त्यांच्याकडे एकूण ९ कोटी ४४ लाख १६ हजारांची जंगम मालमत्ता आहे. तर १ लाख ८५ हजार ९१८ रुपयांची रोख रक्कम आहे. ७ लाख ४३ हजार रुपयाचे सोने असून ७८ हजार रुपयांचे सोन्याचे दागिने आहेत. मेघना बोर्डीकर यांच्या विविध बँक खाती असून शेअर्स बाँड यामध्येही त्यांची मोठी गुंतवणूक आहे.
मेघना बोर्डिकरांचं स्थावर मालमत्तेच्या बाबतीत पारडं जड आहे. त्यांच्याकडे १८ हेक्टर शेतजमीन असून त्याचे बाजारमूल्य पाच कोटी २९ लाख ५७ हजार एवढे आहे. त्यांच्याकडे असलेल्या बिगर शेतजमिनीचे बाजारमूल्य ११ कोटी ४९ लाख ११ हजार एवढे आहे. पुण्याच्या वडगाव शेरी येथे वाणिज्यिक इमारत असून तिचे बाजारमूल्य ३ कोटी ७२ लाख ५४ हजार एवढे आहे. तर बोर्डीकरांचे ठाणे जिल्ह्यातील मानपाडा येथे राहते घर असून त्याची किंमतही १ कोटी २३ लाख २१ हजार रुपये एवढी आहे. अशाप्रकारे बोर्डीकरांकडे स्थावर आणि जंगम मालमत्ता मिळून एकूण तीस कोटींच्या आसपास संपत्ती आहे.
यासोबतच बोर्डीकरांवर कर्जाचा बोजाही मोठा आहे. विविध बँकांचे ७ कोटी ७४ लाख १२ हजार रुपयांचे कर्ज आहे. सन २०१९ साली स्थावर आणि जंगम मालमत्ता मिळून १७ कोटी ६१ लाख एवढी होती. त्यामध्ये दुपटीने वाढ होऊन सन २०२४ साली तीस कोटी रुपयांवर पोहोचली आहे.
बोर्डीकरांवर आतापर्यंत एकून १२ गुन्हे दाखल आहेत. त्यापैकी दहा गुन्ह्यांमध्ये त्यांच्यावर दोषारोपपत्र सिद्ध करण्यात आले आहे. ज्या दहा गुन्ह्यांत त्यांच्यावर दोषारोप सिद्ध करण्यात आला आहे त्यामध्ये कोविड काळात आंदोलन केल्याबाबत गुन्ह्यांचा समावेश आहे. तर एका गुन्ह्यात छत्रपती शिवाजी महाराजांच्या पुतळ्यास निष्काळजीपणे क्रेनमध्ये बसवून हार घालून वाहतुकीस अडथळा केल्याबाबत गुन्हा दाखल करण्यात आला आहे.
एकंदरीतच आमदार मेघना बोर्डीकर यांच्या वार्षिक उत्पन्नात मागील पाच वर्षात तिपटीने वाढ झाली असून त्यांच्या स्थावर आणि जंगम मालमत्तेत दुपटीने वाढ झाली आहे. शेती आणि व्यापार करून वर्षाकाठी एक कोटी सत्तर लाख रुपये कमवणाऱ्या मेघना बोर्डीकरांच्या उत्पन्नाकडे पाहून मात्र सर्वसामान्यांना आश्चर्यच वाटत आहे.