Mahesh Shinde vs Shashikant Shinde: विधानसभा निवडणुकीच्या तोंडावर साताऱ्यातील राजकीय वातावरण तापले आहे. पाटकळ येथे आपल्या कार्यकर्त्यांचा ऊस पेटवल्याचा आरोप करत आमदार महेश शिंदेंनी आक्रमक होत जिल्हा पोलीस अधीक्षकांकडे धाव घेतली आहे. यावरुन शशिकांत शिंदे आणि महेश शिंदे आमनेसामने आले आहेत.
सातारा माध्यमांशी संवाद साधताना महेश शिंदे म्हणाले, ज्या शेतकऱ्याचा ऊस पेटला आहे, त्या शेतकरी दादाला आमच्या कोणत्या कार्यकर्त्याचे नाव माहित असेल तर शेतकरी दादाला विनंती करतो की त्यांनी येऊन सांगावे. गुन्हा दाखल करावा, त्यांची नार्कोटेस्ट व्हावी आणि ज्यांनी आरोप केलेत त्यांचीही नार्को टेस्ट व्हावी. आमच्यावर गुन्हा सिद्ध झाला, तर आयुष्यात राजकारणातून संन्यास घेऊ. लागेल ती शिक्षा आम्ही स्वतः बघू हे आमचे चॅलेंज आहे.
आमदार शशिकांत शिंदे यांना खरोखर माझ्या कार्यकर्त्याचे नाव माहित असेल, तर त्यांनी त्या कार्यकर्त्याचे नाव उघड करावे. शिंदे यांनी माझ्यावर आरोप केला आहे, तर त्यांनी ते नाव उघड करून ते पोलिसांना द्यावे. जर त्यांनी ते नाव दिलं नाही तर मी ५०१ कोटी रुपयांचा त्यांच्यावर मानहानीचा दावा दाखल करणार आहे, असले धंदे आम्ही करत नाही. आम्ही शेतकऱ्यांचे जीवन चांगले करण्यासाठी काम करतो, अशा शब्दांत महेश शिंदेंनी शशिकांत शिंदेंना धारेवर धरले आहे.
कोरेगाव मतदारसंघामध्ये अर्ज भरण्यासाठी विरोधकांची शक्तीप्रदर्शन रॅली झाली. आमचीही रॅली सर्वांनी पाहिली. आमच्या भूमिपुत्रांचा एल्गार पाहिला. परंतु त्यांनी भाडेतत्त्वावर आणलेले सर्व लोक आमच्या ३० टक्के सुद्धा झाले नाहीत. ते अपयश लपवण्यासाठी आज असा पद्धतीने षडयंत्र रचले जात आहे, असा आरोप देखील महेश शिंदेंनी केला आहे.
यासोबतच महेश शिंदेंनी मार्केट कमिटीतील व्यवहारावरूनही शशिकांत शिंदेंना घेरले आहे. ते म्हणाले, ज्या माणसाचे विचार जसे असतात त्याला इतर माणसे तसेच दिसतात. जो अध्यात्माचे जीवन जगतो तो एक नंबर आणि जो जगत नाही तो दोन नंबर असे माझ्या जीवनाचे सूत्र आहे. मार्केट कमिटी खाणारे, माथाडी कामगारांच्या पैशाच्या जीवावर स्वतःचे कुटुंब जगवणारे, गोरगरीब शेतकऱ्यांच्या मालावर शेषवर डल्ला मारणारे त्यांना काय कळणार. दोन नंबर मला कसे कळणार!
‘आज जिथे ऊस पेटला आहे, तेथील माहोल पाहिला तर त्याच्यावरून तुमच्या लक्षात येईल की एक दिल्ली स्थित एजन्सी आहे. शशिकांत शिंदे यांनी ती एजन्सी सव्वा कोटी देऊन हायर केली आहे. ती एजन्सी हे सर्व काम करत आहे. त्या एजन्सीवर सुद्धा १२०ब खाली कलम गुन्हा दाखल करावा, अशी जिल्हा पोलीस अधीक्षकांकडे मागणी केलेली आहे, हे प्रोफेशनल लोक आहेत. आमची इमेज डॅमेज करण्यासाठी विनाकारण कोणाचा बळी घेऊ नका, असे माझे आवाहन आहे, असेही महेश शिंदे म्हणाले.
शशिकांत शिंदेंवर आरोपास्त्र डागत महेश शिंदे पुढे म्हणाले, मी पुरावे दिले आहेत. सोशल मीडियाच्या माध्यमातून पुरावे दिले आहेत. आज आचारसंहिता याठिकाणी लागू असताना त्यांनी नावे घेऊन एखाद्याला बदनाम करण्याचे धाडस कसे केले? त्यामध्ये त्यांना जर पुरावा सापडला असेल तर त्यांनी द्यायला पाहिजे होता. त्यांनी गुन्हा दाखल ताबडतोब करायला हवा होता. मी पोलिस अधीक्षकांकडे तर त्यासाठीच आलो होतो. पोलिसांनी तपास पक्षपातीपणाने करावा आणि ज्यांनी आरोप केलेत त्यांची ही चौकशी करावी. ते आताच पोलीस अधीक्षकांना सांगितले आहे. याठिकाणी 100% एजन्सी फेक नरेटिव्ह करण्यासाठी आणली आहे. गेले कित्येक दिवस या ठिकाणी फेक नरेटिव्ह पसरवत आहेत आणि घराघरात भांडणे लावण्याची काम करत आहेत. ही एजन्सी सर्वसामान्य माणसांवर दहशत कशी पसरवेल हे पण शिकवत आहे. हे गुंड घराघरात जाऊन लोकांना धमकावत आहेत, याबाबतही पोलिसात तक्रार केली आहे.
लोकांकडे विरोधक मत मागण्यासाठी गेले तर काय सांगून मत मागावी, हा प्रश्न त्यांच्यापुढे आहे. गेली २५ वर्षांत जिल्ह्याचे राजकारण केले. परंतु एका गावात गेले तर आमच्या पार्टीने हे काम केले आहे, तर मत द्या जिथे जाईल तिथे रस्ते पाहिले तर सिमेंट काँक्रिटचे रस्ते आहे ते माझ्या काळातील आहेत. सर्व गावे चकाचक करण्याचे काम आम्हीच केले आहे. फेक नॅरेटिव्ह तयार केल्याशिवाय मत मिळू शकत नाही, हे त्यांना माहिती आहे, अशीही टीका देखील महेश शिंदेंनी केली.