आबा पाटलांनी केसाने गळा कापल्याच्या आरोपावर शरद पवार दादांवर भडकले, सत्ता हातात असल्यावर…

सिंचन घोटाळ्याचा उल्लेख आम्ही कोणी केलेला नव्हता. हा प्रश्न कोणी काढला याची माहिती सांगायची मी गरज नाही. अस्वस्थ एका गोष्टीमुळे आहोत, महाराष्ट्राच्या राजकारणामध्ये अत्यंत स्वच्छ राजकारणी म्हणून लौकीक होता, उत्तम प्रशासक म्हणून ओळखल्या जाणाऱ्या नेत्यासंबंधी उलटी सुलटी चर्चा होणे हे अशोभनीय आहे. जी व्यक्ती जावून नऊ वर्षे झाली त्यांच्याबद्दल अशी चर्चा करणं योग्य नव्हतं. सत्ता हातात असल्यावर आपण काही बोलायला मुक्त आहोत असा समज काही घटकांचा असतो कदाचित त्यापैकी हा एक भाग असल्याचं शरद पवार म्हणाले.

फडणवीसांचा खुलासा मी वाचला आहे. ही माहिती मागवायचा अधिकार कोणालाही असल्याचं फडणवीसांनी सांगितलं. त्यामुळे मी फाईल दाखवली यात काही चूक नसल्याचं फडणवीस म्हणाले. मीसुद्धा शासनामध्ये काम केलं आहे, सदनाचे सदस्य बनण्यावेळी आणि शासकीय यंत्रणेमध्ये प्रतिनिधी होण्यासाठी राजभवन येथे शपथ घेताना त्यामध्ये स्वच्छ उल्लेख आहे की, अशा गोष्टी कोणालाही दाखवणार नाही याची गुप्तता ठेवेल. मी सातवेळा शपथ घेतली आहे त्यामध्ये हे वाक्य असल्याचं म्हणत शरद पवारांनी देवेंद्र फडणवीसांवरही निशाणा साधला.

राज ठाकरेंना प्रत्युत्तर

शरद पवारांनी राज्यात जातीय वाद वाढवला असं राज ठाकरे म्हणाले होते. यावर बोलताना, मी राज्यामध्ये जातीयवादी राजकारण केल्याचं एक उदाहरण कोणी मला दाखवावं. ज्यांनी उभ्या आयुष्यात काहीच केलं नाही, वक्तव्य केली. टिप्पणी केली त्यांच्या विधानावर काय भाष्य करायचं? असं म्हणत शरद पवार यांनी राज ठाकरे यांच्यावर जोरदार टीका केली.