Gondia Vidhan Sabha: काँग्रेसने सर्वाधिक ११ निवडणुकांमध्ये यश मिळविले. शिवसेनेने दोनदा तर एकदा अपक्ष उमेदवार विजयी झाले. या निवडणुकीत भाजपने विद्यमान अपक्ष आमदारांना उमेदवारी देत निवडणूक रिंगणात उतरविला आहे.
राज्यात विधानसभेची पहिली निवडणूक १९६२मध्ये घेण्यात आली. १९६२-९९०पर्यंत गोंदिया विधानसभा क्षेत्रावर काँग्रेसचे वर्चस्व होते. यानंतर १९९५ आणि १९९९च्या निवडणुकीत काँग्रेसचा बालेकिल्ला भेदण्यास विरोधकांना यश आले. युतीच्या माध्यमातून शिवसेनेचे रमेश कुथे यांनी दोनदा या मतदारसंघातून विजय मिळविला. यानंतरच्या निवडणुकीत काँग्रेसने पुन्हा आपले वर्चस्व स्थापन केले. २०१९च्या निवडणुकीत काँग्रेसचे गोपालदास अग्रवाल यांनी भाजपमध्ये प्रवेश करून निवडणूक लढविली. त्यांच्याविरुद्ध भाजपचे बंडखोर विनोद अग्रवाल यांनी अपक्ष अर्ज दाखल करीत विजयही मिळविला. या निवडणुकीत आमदार विनोद अग्रवाल यांनी भाजपकडून तर माजी आमदार गोपालदास अग्रवाल यांनी घरवापसी करीत काँग्रेसमधून उमेदवारी मिळविली आहे. दोन उमेदवार खुल्या गटातील असल्याने या मतदारसंघातील ओबीसी समाज कुणाच्या बाजूने वळणार यावर या मतदारसंघातील निवडणुकीचे गणित ठरणार आहे.
बाजपेयी कुटुंबाकडे २३ वर्षे सत्ता
गोंदिया विधानसभा मतदारसंघात १९६७पासून जनसंघ, जनता पार्टी आणि आताचे भाजप काँग्रेसला आव्हान देत आहे. मात्र आजवर या मतदारसंघात कधीही भाजपला यश मिळाले नाही. या मतदारसंघातून पहिल्यांदा आमदार म्हणून मनोहरभाई पटेल विजयी झाले होते. त्यांनी प्रज्ञा समाजवादी पार्टीचे गोपाल नारायण बाजपेयी यांच्यावर विजय मिळविला होता. यानंतरच्या दोन निवडणुका गोपाल नारायण बाजपेयी यांनी काँग्रेसच्यावतीने लढवून विजय मिळविला. १९७८च्या निवडणुकीत राजकुमारी बाजपेयी यांनी निवडणूक लढवली. सलग तीनदा त्यांनी या मतदारसंघाचे प्रतिनिधीत्व केले. एकंदरीत बाजपेयी कुटुंबाकडे सर्वाधिक २३ वर्षे या मतदारसंघाचे नेतृत्व राहिले आहे.
दोन आमदारांची हॅट्‌ट्रिक
गोंदिया विधानसभा मतदारसंघ अस्त्विात आल्यानंतर या मतदारसंघावर सर्वाधिक काँग्रेसचे वर्चस्व राहिले आहे. आतापर्यंत दोन आमदारांनी या मतदारसंघातून तीनदा निवडून येत विजयाची हॅट्‌ट्रिक केली आहे. यात राजकुमारी बाजपेयी यांनी १९७८ ते १९८५पर्यंतच्या निवडणुकीत सलग विजय मिळविला. गोपालदास अग्रवाल यांनी २००४-१४पर्यंतच्या निवडणुकीत सलग विजय प्राप्त करीत हॅट्‌ट्रिक केली होती.