Nandurbar Youth Died In Accident: दिवाळीच्या सुट्टीत घरी आलेल्या एका तरुणाचा ट्रकने दिलेल्या धडकेत मृत्यू झाल्याची धडकी भरवणारी घटना नंदुरबार येथे घडली आहे. या घटनेने त्याच्या कुटुंबीयांना मोठा धक्का बसला आहे.
शहादा तालुक्यातील कलसाडी या गावातील रहिवाशी योगेश मानक चौधरी (वय ३४) हा गुजरात राज्यातील अहमदाबाद येथे एका कंपनीत कामाला होता. दिवाळीनिमित्त काही दिवसांची सुट्टी घेऊन गावाकडे आला होता. २ नोव्हेंबरला दुपारी साडे बारा वाजेदरम्यान काही कामानिमित्त शहादाकडे त्याच्या स्वतःच्या मालकीचे कार आय ट्वेंटी ( क्र. एम. एच. ४८, ए.डब्ल्यू. 7935 ) ने जात होता.
दरम्यान, कलसाडी गावाच्या दीड किलोमीटर अंतरावर समोरून येणाऱ्या ट्रक ( क्र.एम पी. 09, जी.जे.0011) वरील चालकाने भरधाव चालवून योगेश चौधरी यांच्या कारला समोरून धडक दिली. ट्रकने दिलेल्या धडकेमुळे कार रस्त्याच्या कडेला उतरली. कारमध्ये असलेले योगेश चौधरी कारमध्येच दबल्या गेल्याने त्यांना गंभीर दुखापत झाली. उपचारासाठी त्यांना शहादा येथील रुग्णालयात नेण्यात आले. मात्र, त्यांची प्रकृती गंभीर असल्याने त्यांना धुळे येथे पाठवण्यात आले. या दरम्यान त्यांच्या मृत्यू झाला. त्यानंतर शवविच्छेदन करून त्यांच्या मृतदेह त्यांच्या कुटुंबाला सोपवण्यात आला.
आनंदाचा सण दिवाळीत युवकाच्या मृत्यूमुळे गावात एकच शोककळा पसरली आहे. २ नोव्हेंबरला रात्री त्यांच्यावर अंत्यसंस्कार करण्यात आल्याची माहिती आहे. याप्रकरणी विजय शामू चौधरी रा. कलसाडी, ता. शहादा यांच्या फिर्यादीवरून अज्ञात ट्रक चालकाविरुद्ध शहादा पोलीस ठाण्यात भारतीय न्याय संहिता कलम 106 ( 1), 281, 124, (अ) 125 (ब), 324, ( 4), ( 5) सह मोटर वाहन कायदा कलम 184 प्रमाणे गुन्हा दाखल करण्यात आला आहे. याप्रकरणी पुढील तपास सहायक फौजदार संजय ठाकूर करीत आहेत. या घटनेने परिसरातून हळहळ व्यक्त होत आहे.