‘पक्ष मेले तरी चालतील, महाराष्ट्र जगला पाहिजे’ सध्याच्या राजकारणावर राज ठाकरेंचे मोठे वक्तव्य

पूर्वी ठाणे शहर छान, टुमदार होते. तलावांचे शहर अशी ठाण्याची ओळख होती. मात्र विकासकांच्या घशात घालून या शहराचे वाटोळे करण्यात आले, अशी टीका या सभेतून राज ठाकरे यांनी केली. शहरातील तलाव बुजवून तिकडे सोसायट्या आणि कॉलनी उभ्या करण्यात आल्या. आता याठिकाणी टँकरने पाणीपुरवठा केला जातो. या तलावांमध्ये अनेकांना पोहताना मी पाहिले आहे, आता हे तलाव बुजवून उभ्या राहिलेल्या सोसायट्यांमधील तरण तलावात टँकरने पाणी भरले जाते. शहर कशी मोठी करावी, याबाबत दृष्टी नसल्याने सर्व बजबजपुरी झाली, असे टीकास्त्र ठाकरेंनी येथील सत्ताधाऱ्यांवर सोडले. दरम्यान, ठाणे जिल्ह्यातील शहरांवर येणारा नागरीकरणाचा ताण, पहाटेचा शपथविधी, पक्ष फोडाफोडीचे राजकारण, या मुद्द्यांचाही ठाकरे यांनी डोंबिवलीतील सभेप्रमाणेच ठाण्यातही समाचार घेतला. याप्रसंगी मनसेमधील पूर्वीचे पदाधिकारी डी. सी. पाटील यांनी पुन्हा एकदा ठाकरे यांच्या उपस्थितीत पक्षप्रवेश केला.
धनुुष्यबाण आणि शिवसेना ही कोणाची? ‘घड्याळा’वरून अजितदादांनाही सोडलं नाही; पहिल्याच सभेत राज ठाकरे कडाडले

अभिनेते शरद पोंक्षे मंचावर

मनसेच्या या मंचावर ज्येष्ठ अभिनेते शरद पोंक्षे उपस्थित होते. मुख्यमंत्री एकनाथ शिंदे यांच्या शिवसेनेचे उपनेते असलेल्या पोंक्षे यांनी ठाकरे यांचे भाषणाआधी उपस्थितांना संबोधित केले. सध्याच्या राजकीय स्थितीवर पोंक्षे यांनी परखड मत मांडले. मी शिवसेनेचा नावाचा उपनेता असून अद्याप त्याच पक्षात असल्याचेही ते म्हणाले. पोंक्षे यांनी कोणतेही ‘पक्षांतर’ न करता मनसे उमेदवारांना निवडून आणण्यासाठी आवाहन केले, याबाबत मी त्यांचे आभार मानतो, असे याप्रसंगी राज ठाकरे म्हणाले. यासोबतच स्वातंत्र्यवीर सावरकर यांच्या नात आसिलेता राजे – सावरकर या देखील मनसेच्या व्यासपीठावर उपस्थित होत्या. ठाकरे यांनी त्यांचे स्वागत केले. तसेच त्या लवकरच पक्षाच्या कामाला लागणार असल्याचे ठाकरे यांनी सांगितले.