अजितदादांच्या शिलेदाराचा भाऊबीजेला लाडक्या बहिणांना शब्द, ओवाळणीत देणार मोठी भेट

नगर शहर मतदारसंघात प्रमुख तीन उमेदवारांमध्ये लढत होत आहे. महायुतीकडून उपमुख्यमंत्री अजित पवार यांच्या नेतृत्वाखालील राष्ट्रवादी काँग्रेसचे विद्यमान आमदार जगताप, महाविकास आघाडीकडून राष्ट्रवादी काँग्रेस शरदचंद्र पवार पक्षाचे माजी महापौर अभिषेक कळमकर आणि शिवसेना उद्धव बाळासाहेब ठाकरे पक्षाचे बंडखोर प्रा. शशिकांत गाडे अशी लढत होत आहे. याशिवाय महाराष्ट्र नवनिर्माण सेनेसह अन्य पक्ष आणि अपक्ष असे १४ उमेदवार रिंगणात आहेत. मराठा आरक्षण आंदोलनाचे नेते मनोज जरांगे पाटील यांच्या आदेशावरून त्यांच्या उमेदवारांनी मात्र माघार घेतली आहे. काँग्रेसच्या बंडखोर उमदेवारानेही माघार घेतली आहे.

लढतीचे चित्र स्पष्ट झाल्यानंतर आता प्रचाराला वेग आला आहे. गाडे यांच्या बंडखोरीचा कोणाला फायदा होणार, कोणाला तोटा होणार यासोबतच गाडे यांनी बंडखोरी का केली असावी, याचीही चर्चा सुरू आहे. शिवसेनेने राज्यातील बंडखोरांवर कारवाई केली असली तरी अद्याप नगरच्या बाबतीत अशी कारवाई झालेली नाही.

या पार्श्वभूमीवर प्रचाराला सुरवात झाली आहे. जगताप यांची उमेदवारी पक्षाच्या पहिल्याच यादीत जाहीर झाल्याने त्यांनी पूर्वीच प्रचार सुरू केला आहे. मोठ्या सभा, मेळावे घेण्याऐवजी त्यांनी घरोघरी जाऊन प्रचार करण्यावर भर दिला आहे. घरोघरी फुलांच्या पायघड्यांनी व रांगोळ्या रेखाटून जगताप यांचे औक्षण करून महिला भगीनींनी स्वागत केले. भोसले आखाडा भागात माजी उपमहापौर गणेश भोसले यांच्या वतीने ७ जेसीबी मधून पुष्पवृष्टी करून भलामोठा पुष्पहाराने त्यांचे स्वागत केले.

लाडक्या बहिणींनी केलेल्या औक्षणामुळे मी भारावून गेलो आहे. या सर्व बहिणींना विकसित मेट्रोसिटीची ओवाळणी देण्याची जबाबदारी माझी असून यासाठी मी कटीबद्ध आहे. गेल्या १० वर्षांच्या प्रयत्नातून शहरातील नागरिकांना अपेक्षित असलेला विकास मी करू शकलो. आता आपल्या नगरला मेट्रो सिटीचा दर्जा मिळवून द्यायचा आहे. यासाठी मला पुन्हा एकदा सर्व मतदारांनी आशीर्वाद द्यावा, असे आवाहन जगताप यांनी केले.