रहिम शेख ,धाराशिव : तुळजापूर विधानसभा मतदारसंघातील महाविकास आघाडी काँग्रेसचे उमेदवार एडव्होकेट धीरज कदम पाटील यांच्या प्रचार शुभारंभ कार्यक्रमास माजी मंत्री काँग्रेसचे ज्येष्ठ नेते मधुकर चव्हाण यांनी या कार्यक्रमाला दांडी मारल्याचे दिसून आले. राज्याचे माजी मंत्री आमदार अमित देशमुख यांच्या प्रमुख उपस्थितीत हा प्रचार शुभारंभ कार्यक्रम पार पडला असून या कार्यक्रमात मधुकर चव्हाण तसेच त्यांचे समर्थक हे अनुपस्थित राहिल्याने कार्यकर्त्यांमध्ये कुजबुज ऐकण्यास मिळाली. सोनिया गांधी, राहुल गांधी, मल्लिकार्जुन खर्गे, नाना पटोले, बाळासाहेब थोरात यांनी मधुकर चव्हाण यांच्याशी चर्चा केली असून ते नाराज नाहीत, असं आमदार अमित देशमुख यांनी सांगितले. मधुकर चव्हाण यांचे सन्मानाने पुनर्वसन करू असंही आमदार अमित देशमुख यांनी म्हटलं आहे. मधुकर चव्हाण हे गेले ६० वर्ष काँग्रेस पक्षाशी निगडित आहेत. गेले २५ वर्ष म्हणजेच पाच टर्म ते तुळजापूर विधानसभा मतदारसंघातून निवडून गेले आहेत. ५ वर्षे ते कॅबिनेट मंत्री तर १० वर्ष ते मराठवाडा वैधानिक विकास महामंडळाचे अध्यक्ष होते. त्यांनी राज्य शिखर बँक तसेच विविध सहकारी संस्थेवर पदे भूषविले आहेत. तुळजापूर मतदारसंघात त्यांचा दांडगा संपर्क असून कार्यकर्त्यांची फळी मोठी आहे. नाराजीचा फटका या निवडणुकीत विद्यमान उमेदवार एडव्होकेट धीरज कदम पाटील यांना बसतो की काय? अशी चर्चा आता मतदारसंघांमध्ये रंगू लागली आहे.
Raj Thackeray : कितीही मोठे नेते असूदेत, पण राज ठाकरे एकमेव आहेत, जे… संजय मोनेंकडून तारीफ, जुना व्हिडिओ व्हायरल
दरम्यान, माजी मंत्री मधुकर चव्हाण हे आता अपक्ष म्हणून निवडणूक लढवणार होते. महाविकास आघाडीमध्ये वाटाघाटी दरम्यान तुळजापूर विधानसभा मतदारसंघ हा काँग्रेस पक्षाला सुटला आहे. काँग्रेस पक्षातून माजी मंत्री मधुकर चव्हाण हे इच्छुक होते, त्यांनी दोन उमेदवारी अर्ज देखील घेतले होते. तसेच, विद्यमान जिल्हाध्यक्ष तथा जिल्हा परिषद धाराशिवचे माजी अध्यक्ष एडव्होकेट धीरज कदम पाटील हे सुद्धा इच्छुक होते. काँग्रेस पक्षश्रेष्ठींनी माजी मंत्री मधुकर चव्हाण यांच्या ऐवजी जिल्हाध्यक्ष एडव्होकेट धीरज कदम पाटील यांना संधी दिल्याने मधुकर चव्हाण हे नाराज झाले होते. कार्यकर्त्यांबरोबर झालेल्या बैठकीमध्ये त्यांनी अपक्ष लढवण्याचा निर्णय घेतला होता. पण पक्षश्रेष्ठींनी त्यांची समजूत काढून आम्ही तुमचं सन्मानाने राजकीय पुनर्वसन करु असं अश्वासन दिलं. त्यानंतर मधुकर चव्हाण यांनी आपला अपक्ष उमेदवारी अर्ज मागे घेतला.