Rohit Pawar Criticize Devendra Fadnavis : रोहित पवार यांनी युगेंद्र पवार यांच्या प्रचार सभेत उपमुख्यमंत्री देवेंद्र फडणवीस यांच्यावर टीका करत काहीही करा पण पवार साहेबांचा नाद करू नका, असा इशाराच दिला आहे.
राष्ट्रवादी काँग्रेस शरदचंद्र पक्षाचे उमेदवार युगेंद्र पवार यांच्या प्रचारार्थ आमदार रोहित पवार आज बारामतीत आले होते. यावेळी त्यांनी सुपे येथे ग्रामस्थांशी संवाद साधला. पुढे बोलताना ते म्हणाले की, कोल्हापूरलाही असेच कोणीतरी म्हणाले. त्यांना मी सांगू इच्छितो की, दहा दिवस थांबा. १७० ते १८० महाविकास आघाडीचे आमदार निवडून येणार, असा विश्वास यावेळी रोहित पवार यांनी व्यक्त केला.
‘पवार साहेब गेल्या साठ वर्षांपासून राजकारणात आहेत. त्यांनी दिलेला शब्द प्रामाणिकपणे पाळला. पवार साहेब जे शब्द देतात, ते पूर्ण केल्याशिवाय राहत नाहीत. देवेंद्र फडणवीस यांनी त्यांना चॅलेंज केले होत की, पवार साहेबांचं राजकारण आता संपलं आहे. नवीन पैलवानाची आवश्यकता आहे.’
नवीन पैलवान येतील, मात्र वस्ताद एकच…काहीही करा पण पवार साहेबांचा नाद करू नका; रोहित पवारांचं फडणवीसांवर टीकास्त्र
‘फडणवीस कसे पैलवान झाले हे मला माहित नाही. त्यांना बघून वाटतही नाही ते पैलवान आहेत. भले ही नवीन पैलवान येतील, मात्र वस्ताद एकच असतो आणि वस्ताद इतका हुशार असतो की, तो एखादा डाव राखून ठेवतो. मात्र पवार साहेब हे वस्ताद, वस्तादाचे वस्ताद असल्याने त्यांच्याकडे शेकडो डाव आहेत. तुम्ही काहीही करा पण पवार साहेबांचा नाद करू नका,’ असं म्हणत उपमुख्यमंत्री देवेंद्र फडणीसांवर आमदार रोहित पवार यांनी जळजळीत टीका केली.