आधी जंगी स्वागत, नंतर प्रचारात आघाडी, ठाकरेंच्या माजी नगरसेवकाच्या भूमिकेमुळे पवारांचे टेन्शन वाढणार

अहिल्यानगर : राज्यात महायुती आणि महाविकास आघाडीत मोठी चुरस निर्माण झाली आहे. त्यातूनच एकमेकांचा शेलक्या शब्दांत समाचारही घेतला जात आहे. राज्यस्तरावर अशी परिस्थिती असली तरी स्थानिक पातळीवर अनेक नेते वेगळा निर्णय घेत आहेत. अहिल्यानगर शहरात शिवसेना उद्धव बाळासाहेब ठाकरे पक्षाचे माजी नगरसेवक गणेश कवडे यांनी महायुतीचे उमेदवार आमदार संग्राम जगताप यांना पाठिंबा दिला आहे. एवढेच नाही, तर कवडे यांनी त्यांचे प्राबल्य असलेल्या नालेगाव भागात जगताप यांचे जोरदार स्वागत करून प्रचारफेरीही काढली. ठिकठिकाणी दारासमोर रांगोळी काढून महिला औक्षण करत होत्या, नागरिक यावेळी फुलांचा वर्षाव करत फटाक्यांची आतिषबाजी करत होते. नालेगाव ग्रामस्थ पहिल्यांदाच आपसातले गटतट बाजूला ठेवून आमदार जगताप यांच्या स्वागतासाठी एकत्र आलेले दिसले.

नगर शहर मतदारसंघात महायुतीचे आमदार जगताप तर महाविकास आघाडीचे अभिषेक कळमकर यांच्यात लढत होत आहे. शिवसेना आणि काँग्रेसकडून बंडखोरी झाली होती. मात्र, चर्चेनंतर ती शमविण्यात यश आले. तरीही तांत्रिक दृष्टया शिवसेना ठाकरे गटाचे जिल्हाध्यक्ष प्रा. शशिकांत गाडे यांचा उमेदवारी अर्ज कायम राहिला आहे. मात्र, त्यांनी माघार घेत असल्याचे जाहीर केले आहे.
शहांची ठाकरेंवर टीका,राऊतांची आगपाखड;म्हणाले अमित शहा व्यापारी आणि व्यापारी…….
या पार्श्वभूमीवर शिवसेना ठाकरे गटाचे माजी नगरसेवक गणेश कवडे यांनी विकासाच्या मुद्द्यावर जगताप यांना पाठिंबा दिल्याचे जाहीर केले. माजी उपमहापौर गणेश भोसले, दीपक सूळ, शिवसेनेचे जिल्हाप्रमुख अनिल शिंदे, स्थायी समितीचे माजी सभापती किशोर डागवले, संभाजी लोंढे, दत्तात्रय मुदगल, अजय चितळे, नरेंद्र कुलकर्णी, महेश लोंढे, रवी दंडी, कैलास दळवी, गणेश शिंदे, रणजीत परदेशी, मयूर जोशी, काका शेळके, शांताराम राऊत, बाळासाहेब गायकवाड, बाळासाहेब शेळके, भास्कर कवडे यांच्यासह पदाधिकारी, नागरिक उपस्थित होते.

शिवसेना आणि काँग्रेस यांचा नगरच्या जागेवर दावा होता. त्यासाठी काँग्रेसचे शहर जिल्हाध्यक्ष किरण काळे आणि शिवसेनेचे गाडे तसेच माजी महापौर भगवान फुलसौंदर यांनी मोठे प्रयत्न केले. मात्र, त्यांना यश आले नाही. महाविकास आघाडीने ही जागा राष्ट्रवादी काँग्रेस शरदचंद्र पवार पक्षाला सोडली. राष्ट्रवादीने पवार यांचे जुने कट्टर समर्थक माजी आमदार दादा कळमकर यांचे पुतणे माजी महापौर अभिषेक कळमकर यांना उमेदवारी दिली आहे. हा निर्णय झाल्यावर कळमकर एकाकी पडल्याचे चित्र होते. मात्र, पुढे बंडखोरी शमविण्यात यश आले. असे असले तरी शिवसेनेतील काही कार्यकर्ते आतून महायुतीचा प्रचार करीत असल्याचे सांगण्यात येते. तर आता कवडे यांनी उघड भूमिका घेतली आहे.

लेखकाबद्दलविमल पाटीलविमल पाटील, महाराष्ट्र टाइम्स ऑनलाईनमध्ये कंसल्टंट म्हणून कार्यरत आहे. याआधी सामना, आरएनओ वृत्तसंस्थेमध्ये रिपोर्टर म्हणून काम केलं आहे. पत्रकारिता क्षेत्रात तीन वर्षांचा अनुभव आहे. राजकीय आणि विश्लेषणात्मक बातम्या लिहण्याची आवड…. आणखी वाचा