सोलापूरमध्ये तणावपूर्ण वातावरण, माजी आमदाराच्या घरावर दगडफेक, दोन संशयित ताब्यात

सोलापूर शहर मध्य विधानसभा मतदारसंघ दिवसेंदिवस संवेदनशील मतदारसंघ होत चालला आहे. माकपचे उमेदवार आणि माजी आमदार नरसय्या आडम यांच्या घरासमोर अज्ञात लोकांनी केलेल्या गोंधळाची सखोल चौकशी सुरू आहे. बाजार पोलीस ठाण्यात याबाबत नोंद झाली आहे. पोलिसांनी घटनास्थळी जाऊन पंचनामा केला आहे. दोन संशयितांना ताब्यात घेतलं असून गोंधळ करून दगडफेक करणारे कोणत्या पक्षाचे आहेत का? याबाबतचा तपास सुरू आहे.

सोलापूर शहर मध्य विधानसभा मतदारसंघात माकपचे उमेदवार आडम मास्तर यांनी व्हिडीओ चित्रफीत प्रसारित केली आहे. भविष्यात माझ्यावर प्राणघातक हल्ला होऊ शकतो. मी सोलापूर शहर पोलीस प्रमुखांना याबाबत लेखी निवेदन देणार आहे. दगडफेक करणाऱ्यावर कडक कारवाई करा अशी मागणी करणार असल्याचं नरसय्या आडम यांनी सांगितलं.