Uddhav Thackeray: मागील २ दिवस शिवसेना उबाठाचे प्रमुख उद्धव ठाकरेंच्या हेलिकॉप्टरमधील बॅगांची तपासणी निवडणूक अधिकाऱ्यांकडून करण्यात आलेली आहे. यानंतर आता महायुतीमधील नेत्यांचे व्हिडीओ समोर आले आहेत.
एका मराठी वृत्तवाहिनीला दिलेल्या मुलाखतीत उद्धव ठाकरेंनी हेलिकॉप्टरमधील बॅगांच्या तपासणीचा उल्लेख केला. लोकसभेवेळी मुख्यमंत्री शिंदेंच्या बॅगांची तपासणीदेखील नाशिकमध्ये झालेली होती. त्यावेळी शिवसेना उबाठाचे खासदार संजय राऊत यांनी सीएमच्या बॅगांमधून पैशांची ने-आण सुरु असल्याचा गंभीर आरोप केला होता. त्याचा दाखला देत ठाकरेंनी एक, दोन दिवसांत काय घडेल याचं भाकित वर्तवलं. ते अचूक ठरल्याचं दिसत आहे.
‘लोकसभा निवडणुकीवेळी राऊत यांच्या आरोपांनंतर बॅगा तपासणीचं नाटक झालं. आतासुद्धा तेच होईल. आज, उद्या, परवा या तिघांच्या बॅगांचे व्हिडीओ येतील. आमच्या बॅगेत काही नाही हो. फक्त मारी बिस्किट आणि खारी बिस्किट. हेच दाखवणार ते! त्यांच्या (शिंदेंच्या) केवढ्या कपड्यांच्या बॅगा होत्या. माझी कपड्यांची बॅग त्यांनी काल तपासली. किती होते माझे कपडे? त्यांच्या हेलिकॉप्टरमधून किती बॅगा उतरल्या होत्या,’ असं ठाकरे मुलाखतीत म्हणाले होते.
‘आता येत्या काही दिवसांत नाटक करणार ते, बघा तुम्ही. आमच्याही बॅगा तपासल्या जातात हे दाखवतील. कायद्यासमोर सगळे समान असं सांगतील. पण मोदी आणि शहांची बॅग तपासली जाते का? मोदीजींची बॅग मागे एकदा ओडिशात तपासली होती. त्या अधिकाऱ्याला निलंबित केलं होतं. नंतर ते प्रकरण कॅटकडे गेलं आणि मग ते अधिकारी परत सेवेत आले. पण त्या अधिकाऱ्याला निलंबित करण्यात आलेलं होतं, असं ठाकरे म्हणाले.
येत्या काही दिवसांत सत्ताधाऱ्यांकडून बॅगा तपासणीचे व्हिडीओ येतील, असं ठाकरे म्हणाले. ठाकरेंचं भाकित २४ तासांत खरं ठरलं आहे. उपमुख्यमंत्री देवेंद्र फडणवीस, अजित पवार, केंद्रीय मंत्री नितीन गडकरी यांच्या बॅगांच्या तपासणीचे व्हिडीओ समोर आले आहेत. फडणवीसांच्या बॅगांची तपासणी झाल्याचा व्हिडीओ महाराष्ट्र भाजपकडून शेअर करण्यात आलेला आहे. त्यांच्या बॅगांची तपासणी यवतमाळमध्ये झाल्याचा दावा करण्यात आलेला आहे. तर उपमुख्यमंत्री अजित पवारांनी त्यांच्या बॅगांची तपासणी झाल्याचा व्हिडीओ एक्सवर पोस्ट केला आहे. बारामतीत अजित पवारांच्या बॅगांची तपासणी झालेली आहे. गडकरींच्या हेलिकॉप्टरची तपासणी लातूरमध्ये झालेली आहे.