अजित पवारांनी बारामतीत विधानसभा प्रचारादरम्यान लोकसभा निवडणुकीतील पराभवाबद्दल पुन्हा एकदा खंत व्यक्त केली. जनतेने दिलेला ‘झटका’ स्वीकारत त्यांनी विधानसभेत मात्र असाच दणका देऊ नका, अशी विनंती केली. तसेच स्थानिक पुढाऱ्यांवर नाराज न होता त्यांच्याकडून होणाऱ्या चुकांचा बोजा आपल्यावर काढू नका, असे आवाहनही त्यांनी केले.
पुढे बोलताना पवार म्हणाले की, लोकसभेला तुम्ही चांगलाच झटका दिला. तो तुमचा अधिकार होता तो तुम्ही बजावला. मात्र ही विधानसभेची निवडणूक आहे. मी तुमचा प्रतिनिधी आहे. गावच्या पुढार्‍यांचा राग माझ्यावर काढू नका. गावच्या पुढार्‍यांना मी असं वागायला सांगत नाही. त्यांनी चांगलंच वागावं, ते चुकीचे वागले. हेच अजित पवारांच्या पुढे पुढे करत होते. आता अजित पवारांनाच दणका का द्यायचा असं काही करू नका. मात्र पुढे पुढे करणारे लोक उभे राहिल्यावर त्यांना काय दणका द्यायचा आहे तो द्या. त्याबाबत माझं काहीही म्हणणं नाही. पण तो राग माझ्यावर काढू नका, असंही अजित पवार यांनी म्हटलं आहे.
पुढे बोलताना अजित पवार म्हणाले की, अनेक जण मला असे सांगतात की, दादा तुम्ही इतक्या झटपट काम करता की त्याची किंमतच राहत नाही. काही जण म्हटले तहान लागायच्या अगोदरच तुम्ही पाणी देता. त्यामुळे त्या पाण्याचंही महत्त्व राहत नाही. तहान लागल्यानंतर थोड्या हालचालीनंतर पाणी भेटलं की त्याला समाधान वाटतं असं होऊ देऊ नका, असं अजित पवार म्हणाले.