काटोलमध्ये राष्ट्रवादीचे ज्येष्ठ नेते अनिल देशमुख यांच्या गाडीवर अज्ञातांनी हल्ला केल्याची घटना घडली. या हल्ल्यात देशमुख जखमी झाले असून त्यांना नागपूरच्या रुग्णालयात दाखल करण्यात आले आहे. निवडणुकीच्या पार्श्वभूमीवर हा हल्ला झाल्याने खळबळ उडाली असून पोलिसांनी तपास सुरू केला आहे. भाजपने मात्र हा सहानुभूती मिळविण्याचा स्टंट असल्याचा आरोप केला आहे.
सोमवारी विधानसभा निवडणुक प्रचाराचा शेवटचा दिवस होता. अनिल देशमुख यांचा मुलगा सलील हा काटोल विधानसभा मतदारसंघातून राष्ट्रवादीचे उमेदवार आहेत. निवडणूक प्रचाराच्या शेवटच्या दिवशी देशमुख दिवसभर परिसरात प्रचारात होते, नरखेड येथील प्रचार संपल्यानंतर अनिल देशमुख हे तीनखेडा बिष्णूर रस्त्यावरून काटोलकडे परतत असताना, काटोल जलालखेडा रोडवरील बेलफाटा जवळ अज्ञात व्यक्तींनी त्यांच्या वाहनावर दगडफेक केली. या हल्ल्यात अनिल देशमुख जखमी झाले असून, त्यांना तात्काळ काटोल येथील रुग्णालयात दाखल करण्यात आले आहे. पण, दगडफेक करणाऱ्यांची ओळख अद्याप स्पष्ट झालेली नाही. पोलीस या प्रकरणाचा तपास करत आहेत.
घटनेची माहिती मिळताच पोलीस घटनास्थळी दाखल झाले आहेत आणि त्यांनी तपास सुरू केला आहे. प्रारंभिक माहितीनुसार, हल्ला करणाऱ्यांची ओळख अद्याप पटलेली नाही. हल्ल्यात अनिल देशमुख यांच्या डोक्याला गंभीर दुखापत झाली आहे. या घटनेचा एक व्हिडिओ समोर आला आहे ज्यात अनिल देशमुख रक्ताच्या थारोळ्यात पडलेले दिसत असून, तसेच हल्ला करणारे भाजप चे लोकं असा काही शब्द बोलताना दिसत आहेत.
सहानुभूती मिळविण्यासाठी स्टंट, भाजप कडून आरोप
भाजप नेते आणि काटोल विधानसभा मतदारसंघाचे निवडणूक प्रभारी अविनाश ठाकरे यांनी हा निवडणुकीचा स्टंट असल्याची टीका केली आहे. अविनाश ठाकरे म्हणाले, अनिल देशमुख यांचे पुत्र आणि काटोलचे राष्ट्रवादीचे उमेदवार (शरद पवार गट) उमेदवार सलील देशमुख यांचा पराभव यांचा पराभव दिसत आहे. त्यामूळे सहानुभूती मिळविण्यासाठी अनिल देशमुख यांनी त्यांचा कारवर त्यांच्याच कार्यकर्त्याकडून हल्ला केला असल्याचा आरोप केला आहे. ते म्हणले भाजपच्या कार्यकरत्यांवर त्यांनी लावलेले आरोप चुकीचे आहे. हा सहानुभूती मिळवण्याचा स्टंट आल्याचे ठाकरे म्हणाले.