अनिल देशमुख यांचं नाटक, भाजपचा आरोप; काटोलमध्ये वातावरण पेटलं

सोमवारी विधानसभा निवडणुक प्रचाराचा शेवटचा दिवस होता. या रणधुमाळीमध्ये नागपुरातून मात्र धक्कादायक बातमी समोर आली. माजी गृहमंत्री आणि राष्ट्रवादी काँग्रेस शरद पवार गटाचे ज्येष्ठ नेते अनिल देशमुख यांच्या गाडीवर अज्ञातांकडून हल्ला करण्यात आला. या हल्ल्यात अनिल देशमुख जखमी झाले. त्यानंतर त्यांना तात्काळ काटोल येथील रुग्णालयात दाखल करण्यात आले होते. तिथे त्यांच्यावर प्राथमिक उपचार केल्यानंतर त्यांना तातडीने नागपुरच्या खाजगी रुग्णालयात दाखल करण्यात आलं. तर देशमुखांवर झालेल्या हल्ल्याच्या बातमीने त्यांचे समर्थक आणि राष्ट्रवादी शरद पवार गटाचे कार्यकर्ते आक्रमक झाल्याचं पाहायला मिळालं. संतप्त कार्यकर्त्यांनी काटोल पोलिस स्टेशनबाहेर जोरदार गोंधळ घातला. त्यानंतर पोलीसांनी त्यांना शांत करण्याचा प्रयत्न केला. तर नागपूरात रुग्णालाया बाहेरही कार्यकर्त्यांची गर्दी जमलेली. देशमुखांवरील हल्ल्याबाबत माहिती मिळताच पोलीस घटनास्थळी दाखल झाले तसेच त्यांनी तपासही सुरू केलाय.