कोल्हापुरात निकालापूर्वीच समरजीतसिंह घाटगेंच्या विजयाचे पोस्टर, तर शाहूवाडीत विनय कोरेंचं बॅनर

कोल्हापूर जिल्ह्यातील दहा विधानसभा मतदारसंघात अत्यंत चुरशीने मतदान पार पडले. दहाही मतदारसंघातील प्रत्येक लढत अटीतटीची आणि काटाजोड लढत झाल्याने मतदारांसह सर्वांनाच निकालाची प्रतीक्षा लागून राहिली आहे. उद्या (२३ नोव्हें) रोजी सकाळ पासून मतमोजणीला सुरुवात होणार आहे. साधारण सकाळी अकरा वाजेपर्यंत कल कळायला सुरूवात होणार आहे. मात्र, मतमोजणीच्या आधीच शाहूवाडी विधानसभा मतदारसंघात डॉ. विनय कोरे यांच्या विजयाचे पोस्टर झळकले आहेत. वारणानगरच्या नजीक असलेल्या अमृतनगर येथे संजय जाधव, युवराज पाटील, विकास पाटील, अक्षय डोंबे यांच्यासह कार्यकर्त्यांनी हे पोस्टर लावले असून या फलकावर राजकारणातील वस्ताद व मी श्री. विनय विलासराव कोरे ईश्वर साक्ष शपथ घेतो की..! पन्हाळा- शाहूवाडी मतदारसंघातून आमदारपदी निवड झालेबद्दल हार्दिक अभिनंदन, असे लिहिण्यात आले आहे.

या विनय कोरे हे भाजपचे मित्र पक्ष असल्याने महायुतीमध्ये ही जागा विनय कोरे यांना देण्यात आले तर महाविकास आघाडीकडून शिवसेना ठाकरे गटातून सत्यजित पाटील सरूडकर यांना उमेदवारी देण्यात आली होती. हे ते पार पडलेल्या अटीतटीच्या लढतीत दोघेही उमेदवार तुल्यबळ असल्याने निकालाची उत्सुकता सर्वांनाच लागून राहिली आहे. मात्र, पन्हाळा शाहूवाडी विधानसभा मतदारसंघाची परंपरा ही नेहमीच वेगळी राहिली आहे. या मतदारसंघात १९९९ पासून सलग आमदार होण्याची संधी कुणालाच मतदारांनी दिली नाही. दर पाच वर्षाला या मतदारसंघातून आमदार बदलला आहे. २०१४ साली माजी आमदार सत्यजित पाटील सरूडकर ४०० मतांनी विजयी झाले होते.

मात्र, २०१९ ला आमदार विनय कोरे यांनी सत्यजित पाटील सरूडकर यांचा पराभव केला होता. यंदाच्या लोकसभा निवडणुकीत सत्यजित पाटील सरूडकर यांना महाविकास आघाडीने उमेदवारी दिली होती. मात्र, थोडक्यात त्यांचा पराभव झाला. यामुळे यंदाच्या विधानसभा निवडणुकीत सत्यजित पाटील सरूडकर यांना मतदार सहानुभूती दाखवतील अशी अपेक्षा व्यक्त करण्यात येत होती. यामुळे येथे कोण बाजी मारणार याकडे लक्ष लागून राहिले असून येत्या २३ तारखेलाच निकाल समोर येणार आहे. मात्र, कार्यकर्त्यांमध्ये भलताच कॉन्फिडन्स मतदारसंघात दिसून येत आहे.

कागलमध्ये देखील पोस्टर व्हायरल

राज्यात सर्वाधिक चर्चेत असलेल्या कागल विधानसभेत देखील हाय व्होल्टेज लढत पाहायला मिळत आहे. समरजीतसिंह घाटगे विरुद्ध पाच वेळा आमदार असलेले हसन मुश्रीफ अशी लढत होत आहे. २०१९ साली अपक्ष लढलेले समरजीतसिंह घाटगे हे यंदा शरद पवार गटातून उभे असल्याने हसन मुश्रीफ यांना तगडी फाईट दिली आहे. यंदा परिवर्तन अटळ म्हणत कागलमध्ये अनेक ठिकाणी तुतारीला पसंती दिल्याचे दिसत असल्याने सध्या समरजीतसिंह घाटगे यांचं पारडं जड दिसतंय. यामुळे कागल तालुक्यातील वंदूर गावातील राजे प्रेमी गटातील कार्यकर्त्यांनी देखील समरजीतसिंह घाटगे यांच्या विजयाचे पोस्टर सोशल मीडियामध्ये व्हायरल करायला सुरुवात केली आहे.