Vidhan Sabha Nivadnuk 2024 Result: रत्नागिरी, रायगड आणि सिंधुदुर्ग या कोकणातील तीन जिल्ह्यांमध्ये मिळून शिवसेना उद्धव ठाकरे गटाचा केवळ एकच उमेदवार विजयी झाला आहे. या जिल्ह्यांमधीलए इतर १४ मतदारसंघांमध्ये महायुतीच्या उमेदवारांनी बाजी मारली. केवळ ठाकरे गट नव्हे महाविकास आघाडीचाही सुपडा या तिन्ही जिल्ह्यात साफ झाला आहे.
हायलाइट्स:
- कोकणात महाविकास आघाडीचा सुपडा साफ
- तिन्ही जिल्ह्यात मिळून ठाकरे गटाचा एकच उमेदवार
- गुहागरमध्ये भास्कर जाधव विजयी
रत्नागिरी जिल्हा
रत्नागिरी जिल्ह्यामध्ये ५ विधानसभा मतदारसंघ असून यापैकी केवळ गुहागरमध्ये उद्धव बाळासाहेब ठाकरे गटाचे भास्कर जाधव २८३० मतांनी विजयी झाले, त्यांनी शिवसेनेच्या राजेश बेंडल (६८४११ मते) यांचा पराभव केला. दापोलीमध्ये शिवसेनेचे योगेश कदम २४ हजार ९३ मतांनी विजयी झाले असून, त्यांना १ लाख ५ हजार ७ मते मिळाली. त्यांनी शिवसेना उद्धव ठाकरे गटाचे संजय कदम (८०,९१४ मते) यांचा पराभव केला.
चिपळुणात राष्ट्रवादीचे शेखर निकम ९६५५५ मते मिळवून विजयी झाले, त्यांनी राष्ट्रवादी शरदचंद्र गटाचे प्रशांत यादव यांचा ६८६७ मतांनी पराभव केला. तर रत्नागिरीमध्ये उद्धव बाळासाहेब ठाकरे गटाचे बाळ माने यांचा ४१ हजार ५९० मतांनी पराभव झाला असून, या मतदारसंघात शिवसेनेचे उदय सामंत १ लाख ११ हजार ३३५ मते मिळवून विजयी झाले. राजापूरमध्ये किरण उर्फ भैया सामंत (शिवसेना) यांना ८० हजार २५६ मते मिळाली, त्यांनी उद्धव बाळासाहेब ठाकरे गटाचे राजन साळवी यांचा १९६७७ मतांनी पराभव केला.
सिंधुदुर्ग जिल्हा
सिंधुदुर्ग जिल्ह्यातील कणकवली मतदारसंघामध्ये भारतीय जनता पार्टीच्या नितेश राणेंचा विजय झाला असून, ५८,००७ मतांनी त्यांचा विजय झाला. त्यांनी शिवसेना उद्धव ठाकरे गटाच्या संदेश पारकर (५०,३६२ मते) यांचा पराभव केला. सावंतवाडीमध्ये शिवसेनेचे दीपक केसरकर यांचा विजय झाला असून त्यांना ८१ हजार ८ मते मिळाली. त्यांनी शिवसेना उद्धव ठाकरे गटाच्या राजन तेली (४१,१०९ मते) आणि अपक्ष उमेदवार विशाल परब (३३,२८१ मते) यांचा पराभव केला. कुडाळमध्येही शिवसेनेच्या निलेश राणेंचा विजय झाला असून त्यांना ८१ ६५९ मते मिळाली. त्यांनी शिवसेना उद्धव ठाकरे गटाच्या वैभव नाईक यांचा ८१७६ मतांनी पराभव केला.
रायगड जिल्हा
पनवेल मतदारसंघामध्ये भाजपच्या प्रशांत ठाकूर यांनी सोळाव्या फेरीअंती २८ हजारांहून अधिक मतांनी आघाडी घेतली आहे, याठिकाणी बलराम पाटील पिछाडीवर आहेत. कर्जतमध्ये शिवसेनेचे विद्यमान आमदार महेंद्र थोरवे यांनी २३व्या फेरीअंती ५००० मतांनी आघाडी घेतली असून, शिवसेना उद्धव ठाकरे गटाचे नितिन राऊत आणि अपक्ष उमेदवार सुधाकर घारे पिछाडीवर आहेत. उरणमध्ये भाजपचे महेश बालदी १११७ मतांनी आघाडीवर (१२व्या फेरीअंती) असून त्यांनी शिवसेना ठाकरे गटाचे उमेदवार मनोहर भोईर आणि शेकापच्या प्रीतम म्हात्रे यांना मागे टाकले आहे.
पेणमध्ये शिवसेना उद्धव ठाकरे गटाच्या प्रसाद भोईर यांना हरवून भारतीय जनता पार्टीचे रवीशेठ पाटील विजयी झाली आहे. अलिबागमध्ये शिवसेनेचे महेंद्र दळवी २३,४५८ मतांनी (२४व्या फेरीअंती) आघाडीवर असून त्यांनी शेकापच्या चित्रलेखा पाटील यांना मागे टाकले आहे. श्रीवर्धनमध्ये आदिती तटकरे विजयी झाल्या असून त्यांनी राष्ट्रवादीच्या (शरदचंद्र पवार गट) अनिल नवगणे यांचा पराभव केला. महाडमध्ये शिवसेनेच्या भरत गोगावले यांचा विजय झाला असून, त्यांनी २६,२१० मतांनी शिवसेना ठाकरे गटाच्या स्नेहल जगताप यांचा पराभव केला.