पुणे : विधानसभा निवडणुकीच्या २८८ जागांचे निकाल आता समोर आले आहेत. राज्यात पुन्हा एकदा महायुतीचे सरकार येणार आहे. पुण्यातील पुरंदर विधानसभा मतदारसंघामध्ये विजय शिवतारे यांनी विजय मिळवला आहे. पुणे जिल्ह्यामधील चर्चेत राहिलेल्या पुरंदर विधानसभा मतदारसंघामध्ये यंदा तिरंगी लढत होती. शिवसेना शिंदे गटाचे विजय बापू शिवतारे यांनी २४१८८ मतांनी विजय मिळवला आहे. काँग्रेसने विद्यमान आमदार संजय जगताप यांचा पराभव केला. विजय बापू शिवतारेंना १,२५,८१९, संजय जगताप १,०१,६५१ आणि संभाजी झेंडे ४७,१९६ मते मिळाली आहेत. विजय शिवतारे हे खासदारकीसाठी इच्छुक होते पण त्यांना विधानसभेला उमेदवारी देण्यात आली. पुरंदर विधानसभा निवडणुकीमध्ये २००९ आणि २०१४ मध्ये विजय शिवतारे यांनी विजय मिळवला होता. मात्र २०१९ ला संजय जगताप यांनी विजय मिळवत शिवतारेंचा पराभव केला होता. आता पुन्हा एकदा विजय शिवतारे यांनी पुरंदरमध्ये आमदारकी मिळवली आहे.