Mumbai Vile Parle Teens Accident: विलेपार्ले येथे मौजमजा करण्यासाठी घराबाहेर पडलेल्या चार मित्रांच्या कारला अपघात झाला. यामध्ये दोघांना मृत्यू झाला आहे. हे मित्र मद्यधुंद अवस्थेत असल्याची माहिती आहे.
हे चारही मित्र रात्री उशिरा वांद्रे ते गोरेगावला निघाले होते. अपघाताच्या वेळी चालक मद्यधुंद अवस्थेत होता आणि तो भरधाव वेगात कार चालवत होता. पोलिसांनी दिलेल्या माहितीनुसार, याप्रकरणाच्या अहवाल आल्यानंतर पुढील कारवाई केली जाईल.
सहारा स्टार हॉटेलजवळ साहिल मेंढा या १८ वर्षीय मद्यधुंद अवस्थेत असलेल्या तरुणाचे कारवरील नियंत्रण सुटले आणि त्यानंतर कार सर्व्हिस रोड आणि उत्तरेकडील पुलाच्या दरम्यानच्या दुभाजकावर जाऊन आदळली. हा अपघात इतका भीषण होता की कारच्या मागील सीटवरील दोन अल्पवयीन मुलांचा मृत्यू झाला. जलाज धीर आणि सार्थक कौशिक अशी मृतांची नावे असून हे दोघेही १८ वर्षांचे होते.
विलेपार्ले पोलिसांनी या प्रकरणी साहिल मेंढा याला अटक केली. एका पोलीस अधिकाऱ्याने दिलेल्या माहितीनुसार, “आम्ही आरोपीला अटक केली आहे आणि त्याच्या रक्ताचे नमुने घेतले आहेत आणि सध्या त्याच्या अहवालाची वाट पाहत आहोत.”
एफआयआरनुसार, तक्रारदार जेडन जिमी (१८) हा सांताक्रूझचा रहिवासी आहे, जो ATLAS स्किलटेक युनिव्हर्सिटी, बीकेसी येथे प्रथम वर्षाचा बीबीएचा विद्यार्थी आहे. त्याचे मित्र जलज धीर आणि साहिल मेंढा हे एकाच संस्थेतील बीबीएच्या प्रथम वर्षाचे विद्यार्थी होते पण ते वेगवेगळ्या विभागात होते. त्यांचा दुसरा मित्र, सार्थक कौशिक, विलेपार्ले पश्चिम येथील नरसी मोंजी इन्स्टिट्यूट ऑफ मॅनेजमेंट स्टडीजमध्ये विज्ञानाच्या प्रथम वर्षाचा विद्यार्थी होता.
ते २००२ पासून मित्र होते. २२ नोव्हेंबरला दुपारी जेडन आणि साहिलने जलजच्या घरी कॅबने गेले. जलज हा गोरेगाव पूर्व येथील ओबेरॉय एक्झिक्युटिव्ह येथे राहतो. दुपारपासून ते सायंकाळी साडे सहा वाजेपर्यंत ते जलजच्या घरी व्हिडिओ गेम खेळले. संध्याकाळी साडे सहाच्या सुमारास जेडन आणि साहिलने अंधेरी पश्चिम येथे राहणाऱ्या त्यांच्या एका मैत्रिणीला भेटण्याचे ठरवलं. सायंकाळी साडे सातच्या सुमारास ऑटोरिक्षाने ते तिच्या घरी पोहोचले. तिच्या राहत्या घरी साहिलने दोन पेग वोडकाचे घेतले तर जेडन ने एक पेग घेतला.
रात्री जेवणानंतर त्यांनी रात्री साडे दहा वाजेपर्यंत गप्पा मारल्या. मग ते रात्री ११ वाजता गोरेगाव पूर्व येथील जलजच्या घरी परतले. मध्यरात्रीच्या सुमारास सार्थकने जेडनला फोन केला. त्यांच्यासोबत सहभागी होण्याची इच्छा व्यक्त केली. तो रात्री साडेबाराच्या जलजच्या घरी पोहोचला. पहाटे साडे तीनच्या सुमारास त्यांनी साहिलच्या कारने वांद्र्याला लाँग ड्राईव्हला जायचे ठरवले.
सुरुवातीला, जेडनने कार चालवली. कारण त्याच्याकडे ड्रायव्हिंगचा परवाना होता. पहाटे चारच्या सुमारास साहिलने गाडी आपल्या हाती घेतली आणि त्यांनी वांद्रे गाठले. पहाटे ४.१० च्या सुमारास वांद्रे पश्चिमेकडील सिगडी येथून खाण्याचं सामान घेतलं. त्यानंतर ते घरी परतत होते. तेव्हा साहिल १२०-१५० किमी/तास वेगाने गाडी चालवत होता. सहारा स्टार हॉटेलजवळ सर्व्हिस रोड घ्यायचा की पूल यामध्ये त्याचा गोंधळ झाला आणि त्यातच त्याचं कारवरील नियंत्रण सुटलं. त्यामुळे कार सर्व्हिस रोड आणि उत्तरेकडील पुलाच्या दरम्यानच्या दुभाजकावर जाऊन आदळली.
यामध्ये जेडन आणि साहिल किरकोळ जखमी झाले. तर, जलजला जोगेश्वरी पूर्व येथील ट्रॉमा हॉस्पिटलमध्ये नेले आणि जलजला कोकिलाबेन रुग्णालयात हलवले. मात्र तिथे डॉक्टरांनी त्याला मृत घोषित केले. दरम्यान, साहिलने सार्थकला वांद्रे पश्चिम येथील भाभा रुग्णालयात नेले, तेथे तपासणीनंतर डॉक्टरांनी त्याला मृत घोषित केले. त्यानंतर जेडनने पोलिसांत तक्रार दाखल केली.
लेखकाबद्दलनुपूर उप्पलनुपूर उप्पल, महाराष्ट्र टाइम्स ऑनलाईन टीममध्ये डिजिटल कंटेंट प्रोड्युसर म्हणून कार्यरत आहेत, याआधी टीव्ही ९ मराठी, साम टीव्ही, इन मराठी वेबसाईटसाठी काम केलंय. डिजिटल पत्रकारिता क्षेत्रात ७ वर्षांचा अनुभव. राजकीय, सामाजिक लिखाणाची आवड. गुन्हेगारीसंबंधित, विज्ञानविषयक बातम्यांमध्ये हातखंडा… आणखी वाचा