अंबरनाथच्या रेसिनो ड्रग्स कंपनीत भीषण स्फोट, आजूबाजूच्या कंपन्याही जळून खाक

अग्निशमन दलाच्या कर्मचाऱ्यांनी दिलेल्या माहितीनुसार या कंपनीत रविवारी रात्री साडे नऊच्या सुमारास रसायनामुळे रेसिनो ड्रग्स कंपनीत आग लागल्याने कंपनीतील प्लांटमध्ये आग लागून स्फोट झाला. त्यानंतर या कंपनीतून केमिकल बाहेर वाहत येत असल्याने शेजारच्या कंपन्यांनाही आगीची झळ बसल्याचे प्रत्यक्षदर्शींनी सांगितले. तसेच, कंपनी बाहेरच्या नाल्यामध्ये रसायन पसरल्याने येथेही काही काळ भडका उडाला होता. त्यामुळे येथे गोंधळाची स्थिती निर्माण होऊन आजूबाजूच्या चार कंपन्यांना आग लागली होती.

दरम्यान, रविवारी (२४ नोव्हेंबर) मध्यरात्रीपर्यंत आगीवर नियंत्रण मिळवण्यात यश आले नव्हते. दुसरीकडे, कंपनीत आगीची घटना घडली तेव्हा १० ते १५ कर्मचारी होते. त्यापैकी प्लांट ऑपरेटर अनिल यादव हे या आगीच्या कचाट्यात होरपळून गंभीर जखमी झाले आहेत. मात्र, आतापर्यंत कोणत्याही प्रकारची जीवितहानी झाली नसून पाहटे उशिरापर्यंत आगीवर नियंत्रण मिळविण्याचे सांगण्यात आले.

ही भीषण आग आटोक्यात आणण्यासाठी अंबरनाथ, बदलापूर, उल्हासनगर, कल्याण-डोंबिवली आणि एमआयडीसीच्या अग्निशनमन दलाच्या जवानांकडून अथक प्रयत्न करण्यात आले. ५० हुन अधिक बंब आणि अनेक पाण्याचे टँकर आणून या आगीवर नियंत्रण मिळवण्यात यश आलं. सध्या या ठिकाणी कुलिंगचे काम सुरू असून भीषण आगीत कंपनीचे मोठे नुकसान झाले आहे. तर या आगीत काही वाहनं जळून खाक झाली आहे. तसेच, कंपनीच्या बाजूने जाणारी पाईपलाईन देखील फुटली आहे.