Who Will Be The Minister From Beed: बीडमध्ये महायुतीने मोठा विजय मिळवला. पण, आता महायुतीसमोर मोठा पेच निर्माण झाला आहे. कारण, बीडमध्ये मंत्रिपदासाठी चार नावं चर्चेत आहेत.
बीडमध्ये सर्वात मोठा विजय मिळवला तो धनंजय मुंडे यांनी, शरद पवारांचे चक्रव्यूह भेदत मिळवलेला हा विजय सर्वात मोठा होता. या विधानसभा निवडणुकीत राष्ट्रवादी काँग्रेस शरद पवार गटाच्या उमेदवाराला जेमतेम २५ टक्के मतं मिळवता आली. त्यामुळे धनंजय मुंडे हे मंत्रिपदाचे प्रमुख दावेदार ठरले आहेत.
आपल्या रांगड्या स्वभावामुळे ओळखले जाणारे आष्टी विधानसभा मतदारसंघाचे भाजपचे सुरेश धस यांनीतर चौरंगी लढतीत थोडी थोडकी नव्हे तर ७८ हजारांपर्यंत मताधिक्य मिळवले आहे. देवेंद्र फडणवीस यांचे निकटवर्तीय म्हणून सुरेश धस यांची ओळख आहे. यामुळेच ते मंत्रिपदाचे दावेदार असल्याचे बोलले जात आहे.
बीड जिल्ह्यातील ज्येष्ठ नेते आणि तब्बल पाचव्या विधानसभा निवडणुकीत विजय मिळवणारे माजलगाव मतदार संघाचे आमदार प्रकाशदादा सोळंके हे देखील मंत्रिपदाचे प्रबळ दावेदार मानले जात आहेत. गेल्या सरकारमध्ये प्रकाश सोळंके यांना मंत्रिपद न भेटल्याने ते नाराज असल्याचे दिसून आले होते. त्यांची नाराजगी पक्षाला परवडणारी नसेल म्हणून तेही मंत्रिपदाचे दावेदार आहेत.
लोकनेते गोपीनाथ मुंडे यांच्या कन्या पंकजा मुंडे या जरी विधान परिषदेवर आमदार असल्या तरी देखील विधानसभा निवडणुकीत पंकजा मुंडे यांनी महायुतीसाठी सभा घेतलेल्या २७ पैकी २३ मतदारसंघात महायुतीचे उमेदवार विजयी झाले. यामुळे भाजपाला त्यांना डावलता येणार नाही. तसेच, ओबीसी आक्रमक चेहरा म्हणून पंकजा मुंडे यांना भाजपाला याचा मोठा फायदा भविष्यात होऊ शकतो. यामुळेच पंकजा मुंडेही मंत्रिपदाच्या दावेदार असतील.
Beed News: मुंडे बहीण-भाऊ निवडणुकीत एकत्र, मंत्रिपदासाठी आमनेसामने, बीडमध्ये मंत्रिपदाची माळ कोणाच्या गळ्यात?
आता बीड जिल्ह्यात मंत्रिपदासाठी हे प्रमुख चार दावेदार असल्याने नेमके मंत्री पदाची माळ कुणाच्या गळ्यात पडणार याकडे सर्वांचे लक्ष लागलेले असतानाच महायुतीची देखील मोठी कसोटी लागणार आहे.