New Chief Minister Of Maharashtra: राज्यातील विधानसभा निवडणुकीचे निकाल जाहीर झाल्यानंतर दोन दिवस झाले तर अद्याप सरकार स्थापनेचा दावा करण्यात आला आहे.
२०१९ साली राज्यात निवडणुका झाल्यानंतर मुख्यमंत्रीपदावरून भाजप आणि शिवसेना यांच्यात वाद सुरू झाला आणि तेव्हा राज्यपाल भगत सिंह कोश्यारी यांनी राष्ट्रपती राजवट लागू करण्याची शिफारस केली. त्यानंतर देवेंद्र फडणवीस यांचे सरकार स्थापन झाल्यानंतर ११ दिवसांनी राष्ट्रपती राजवट लागू झाली. पण ते सरकार फक्त ८० तास टिकले. त्यानंतर उद्धव ठाकरे यांचा शपथविधी होईपर्यंत फडणवीस कार्यवाहक मुख्यमंत्री होते.
राज्यात महायुतीला प्रचंड असा विजय मिळाला असला तरी अद्याप मुख्यमंत्रीपदाचा निर्णय झालेला नाही. विधानसभेच्या नव्या सदस्यांनी शपथ घेतली नाही. तरी राज्यात १५व्या विधानसभेची निर्मिती झाली आहे. निवडणूक आयोगाने मतमोजणी पूर्ण झाल्यानंतर विजेत्यांना प्रमाणपत्र दिले आणि नव्या विधानसभेच्या निर्मितीची औपचारिकता पूर्ण केली. २३ तारखेला निकाल जाहीर झाल्यानंतर आयोगाने राज्य सरकारच्या राजपत्रात नव्या आमदारांची नावे प्रकाशीत केली आणि त्याची प्रत राज्यपालांकडे सोपवली.
राज्य घटना काय सांगते
नियोजित वेळेत जर सरकार स्थापन झाले नाही किंवा कोणी तसा दावा केला नाही तर राज्यपालांना घटनेच्या ३५६ कलमाच्या आधारे राष्ट्रपती शासन लागू करण्याची शिफारस करावी लागते. घटनेच्या १७२ कलमानुसार राज्य विधीमंडळाचा कालावधी ५ वर्षाचा असतो. काही आणिबाणीच्या परिस्थितीत संसदेच्या मंजूरीने एक वर्षाची मुदत वाढ देता येते. त्यानंतर ६ महिन्याची मुदत वाढ मिळू शकते.
राष्ट्रपती शासन लागू करण्याची शिफारस करण्याआधी राज्यपाल सर्वात मोठ्या पक्षाला सत्ता स्थापनेचे आमंत्रण देऊ शकतात. जर भाजपने शपथ घेण्याची तयारी दाखवली तर राष्ट्रपती शासन लागू होणार नाही. सूत्रांनी दिलेल्या माहितीनुसार उद्या मंगळवारी एकनाथ शिंदे मुख्यमंत्रीपदाचा राजीनामा देणार आहेत. त्यानंतर सरकार स्थापनेचा दावा केला जाईल.