Eknath Shinde: विधानसभा निवडणुकीत महायुतीला दणदणीत विजय मिळाल्यानंतरही सत्ता स्थापनेचा तिढा कायम आहे. २०१९ प्रमाणेच आताही भाजप आणि शिवसेना यांच्यात तिढा निर्माण झाला आहे.
काळजीवाहू मुख्यमंत्री असलेले एकनाथ शिंदे, देवेंद्र फडणवीस, अजित पवार केंद्रीय गृहमंत्री अमित शहांची भेट घेतील. त्यामध्ये सत्ता स्थापनेबद्दल चर्चा होईल. मंत्रिपदांच्या वाटपावरही निर्णय घेतला जाईल. मुख्यमंत्रिपदाबद्दलचा निर्णय अमित शहाच जाहीर करतील. त्यामुळे मुख्यमंत्रिपदाबद्दलचा सस्पेन्स कायम आहे. मुख्यमंत्रिपद पुन्हा मिळणार नसल्यानं शिंदे नाराज असल्याचं समजतं.
भाजपच्या नेतृत्त्वानं मुख्यमंत्रिपदासाठी देवेंद्र फडणवीस यांच्या नावावर जवळपास शिक्कामोर्तब केलं आहे. ‘आपल्याला अजून एक वर्ष मुख्यमंत्रिपदावर राहू द्या, अशी विनंती शिंदेंनी केली आहे. त्यानंतर देवेंद्र फडणवीस यांच्यासाठी आपण बाजूला होऊ, असं शिंदेंनी भाजप नेतृत्त्वाला सांगितलं आहे. विधानसभा निवडणुका आपल्या नेतृत्त्वात झाल्या. महायुतीनं त्यात नेत्रदीपक यश मिळवलं. अशा परिस्थितीत निकालानंतर तातडीनं आपल्याला बाजूला केल्यास त्यातून चुकीचा मेसेज जाईल, अशी भूमिका शिंदे मांडत आहेत,’ अशी माहिती सुत्रांनी दिली.
‘भाजप शिंदेंना पुन्हा मुख्यमंत्रिपद देण्यास तयार नाही. भाजपकडून शिंदेंना दोन पर्याय देण्यात आलेले आहेत. नव्या सरकारमध्ये उपमुख्यमंत्री व्हा किंवा केंद्रात या आणि तुमच्या जागी लेकाला राज्य सरकारमध्ये पाठवा,’ असे दोन प्रस्ताव भाजपकडून शिंदेंना देण्यात आल्याची माहिती सुत्रांकडून मिळाली आहे. याबद्दल शिंदे आणि फडणवीस यांच्यात चर्चा झाली. पण त्यावर कोणताच निर्णय झालेला नाही. त्यामुळे आता याविषयी भाजप नेतृत्त्व हस्तक्षेप करणार आहे. डेक्कन क्रोनिकलनं याबद्दलचं वृत्त दिलं आहे.
राज्यात बिहार पॅटर्न राबवण्यात यावा. बिहारमध्ये कमी जागा असूनही जेडीयूच्या नितीश कुमार यांनाच भाजपनं पुन्हा मुख्यमंत्री केलं. तसंच महाराष्ट्रातही करण्यात यावं, असा आग्रह शिवसेनेकडून करण्यात येत आहे. पण भाजप बिहार पॅटर्न राबवण्याच्या मनस्थितीत नाही. भाजपनं शिंदेंना पुन्हा मुख्यमंत्री करण्याबद्दल कोणताही शब्द दिलेला नव्हता, असं भाजप नेत्यांकडून स्पष्टपणे सांगण्यात आलेलं आहे.