Ajit Pawar: विधानसभा निवडणुकीतील दणदणीत विजयानंतर आता महायुतीत सत्ता स्थापनेच्या हालचाली वेगानं सुरु झाल्या आहेत. एकनाथ शिंदेंनी मुख्यमंत्रिपदावरील दावा सोडला आहे.
महायुती सरकार २.० मध्ये राष्ट्रवादी काँग्रेसला ९ कॅबिनेट, ३ राज्यमंत्रिपदं हवी आहेत. गेल्या सरकारमध्ये राष्ट्रवादी काँग्रेसचे ९ मंत्री होते. ते सगळेच कॅबिनेट मंत्री होते. मागील सरकारमध्ये असलेला कॅबिनेट मंत्रिपदांचा आकडा कायम राहावा. त्यासोबत ३ राज्यमंत्रिपदं मिळावीत, अशी राष्ट्रवादी काँग्रेसची मागणी आहे. सत्ता स्थापनेबद्दल चर्चा करण्यासाठी उद्या दिल्लीत महायुतीची महत्त्वाची बैठक आहे. केंद्रीय गृहमंत्री अमित शहांच्या अध्यक्षतेखाली ही बैठक होणार आहे.
मुख्यमंत्री शिंदे यांच्या मंत्रिमंडळात राष्ट्रवादी काँग्रेसचे ९ नेते होते. त्यांच्याकडे कॅबिनेट मंत्रिपदं होती. त्यातील दोघांना डच्चू मिळण्याची दाट शक्यता आहे. त्यांच्या जागी दोन नव्या आमदारांना संधी मिळेल. राष्ट्रवादीला ३ राज्यमंत्रिपदं हवी आहेत. या मंत्रिपदांवर तरुण चेहऱ्यांना संधी दिली जाणार आहेत. गेल्या मंत्रिमंडळातील ७ चेहऱ्यांना राष्ट्रवादीकडून पुन्हा संधी दिली जाणार आहे.
राज्याच्या मंत्रिमंडळात एकूण ४३ जण असतात. हा कमाल आकडा आहे. गेल्या मंत्रिमंडळात केवळ २८ मंत्री होते. त्यात शिवसेना, राष्ट्रवादी काँग्रसचे प्रत्येकी ९ जण होते. अजित पवारांची महायुतीत एन्ट्री झाल्यानंतर मंत्रिमंडळ विस्तार झाला. अजित पवारांसह ९ जणांनी मंत्रिपदाची शपथ घेतली. पण त्यानंतर मंत्रिमंडळाचा विस्तार झालाच नाही. त्यामुळे १५ मंत्रिपदं अखेरपर्यंत रिक्त राहिली. त्यामुळे अनेक मंत्र्यांकडे अनेक मंत्रालयांची जबाबदारी होती.
आता नव्या सरकारमध्ये भाजपला २१, शिवसेनेला १२ आणि राष्ट्रवादीला १० मंत्रिपदं मिळतील, अशी शक्यता वर्तवली जात होती. पण राष्ट्रवादीनं १२ मंत्रिपदांची मागणी केली आहे. शिंदे यांनी मुख्यमंत्रिपदारील दावा सोडला आहे. त्यामुळे शिवसेनेला नव्या सरकारमध्ये उपमुख्यमंत्रिपद मिळणार आहे. गृह विभागासाठी शिवसेना आग्रही आहे. गेल्या सरकारमध्ये गृह विभाग देवेंद्र फडणवीसांकडे होता.