Eknath Shinde: उपमुख्यमंत्रिपद घ्यायचे की नाही? अमित शाहांसोबतच्या बैठकीनंतरही संभ्रम कायम, शिंदे काय करणार?

एकनाथ शिंदे यांनी मुख्यमंत्रिपदाच्या शर्यतीतून माघार घेतल्यानंतर देवेंद्र फडणवीस यांचे नाव जवळपास निश्चित मानले जात आहे. एक मुख्यमंत्री आणि दोन उपमुख्यमंत्री असे सूत्र ठरले असून त्यानुसार शिंदे यांची उपमुख्यमंत्रिपदावर वर्णी लागण्याची शक्यता आहे. मात्र मुख्यमंत्रिपद भूषवल्यानंतर ‘उप’मुख्यमंत्रिपदाची जबाबदारी घेण्याऐवजी पक्षातूनच अन्य नेत्याला संधी देण्याबाबत शिंदे यांचा विचार सुरू असल्याचे कळते. याला दुजोरा देतानाच, महाराष्ट्राचे माजी मुख्यमंत्री एकनाथ शिंदे हे राज्याच्या नव्या सरकारमध्ये कदाचित उपमुख्यमंत्रिपद स्वीकारणार नाहीत अशी माहिती शिंदे यांचे निकटवर्तीय असलेले आमदार संजय शिरसाट यांनी गुरुवारी दिली. असे असले तरी त्याबदल्यात शिवसेनेकडे नगरविकास, सार्वजनिक बांधकाम आणि जलसंपदा अशा तीन महत्त्वाच्या विभागांची जबाबदारी येण्याची शक्यता आहे.

विधानसभा निवडणुकीच्या निकालानंतर महायुतीने विजयोत्सव साजरा केला, मात्र यानंतर पाच दिवस उलटल्यावरही अद्याप मुख्यमंत्रिपदाचा चेहरा ठरलेला नाही. याबाबत आता थेट दिल्ली दरबारी भाजप पक्षश्रेष्ठींच्या उपस्थितीत गुरुवारी रात्री बैठक होत आहे. यासाठी काळजीवाहू मुख्यमंत्री एकनाथ शिंदे, देवेंद्र फडणवीस आणि अजित पवार राजधानीत दाखलही झाले. यातून काय निर्णय होणार याकडे सगळ्यांचे लक्ष लागले आहे. ‘भाजपचा निर्णय मला मान्य असेल’, असे स्पष्ट केल्यानंतरही एकनाथ शिंदे हे उपमुख्यमंत्रिपद स्वीकारणार की नाही, याबाबत संभ्रमच आहे.

महायुतीच्या प्रमुख नेत्यांची केंद्रीय गृहमंत्री अमित शहा यांच्या निवासस्थानी गुरुवारी रात्री उशिरा बैठक सुरू झाल्याचे समजते. यावेळीच शिंदे यांच्याबाबतचा निर्णयही होणार आहे. शिंदे हे आपले पुत्र, खासदार श्रीकांत शिंदे यांच्यासह रात्री साडेनऊच्या सुमाराला शहा यांच्याकडील बैठकीसाठी दिल्लीत आले. या महत्त्वाच्या बैठकीपूर्वी भाजपच्या केंद्रीय नेतृत्वाच्या बैठका झाल्याची माहिती मिळते.

महाराष्ट्राच्या मुख्यमंत्रिपदासाठी राष्ट्रीय स्वयंसेवक संघही सक्रिय झाल्याचे सांगितले जाते. संघाचा फडणवीस यांच्यासाठी आग्रह आहे. भाजप वर्तुळातूनही त्यांचे नाव जवळपास निश्चित झाले असले, तरी याबाबतची घोषणा दिल्लीतील बैठकीनंतर होण्याची शक्यता अंधुक आहे. भाजपच्या केंद्रीय पर्यवेक्षकांच्या उपस्थितीत मुंबईत बहुधा शनिवारी भाजप विधिमंडळ पक्षाची बैठक होईल. त्यातच राज्यातील पुढील मुख्यमंत्र्यांचे नाव निश्चित होणार आहे.