Eknath Shinde: आधी दोन दिवस मौन, मग मुख्यमंत्रिपदावरील दावा सोडून दिल्लीत अमित शहांची भेट घेणाऱ्या एकनाथ शिंदेंनी मुंबईत परतल्यानंतर अचानक गावी जाण्याचा निर्णय घेतला.
सत्ता स्थापनेसाठी भाजप नेतृत्त्व घेईल तो निर्णय मला आणि माझ्या शिवसेनेला मान्य असेल, असं शिंदे दोनच दिवसांपूर्वी पत्रकार परिषदेत म्हणाले. माझ्याकडून कोणताही अडसर येणार नाही, असं शिंदेंनी स्पष्ट केलं. त्यामुळे शिंदेंनी मुख्यमंत्रिपदावरील दावा सोडल्याची चर्चा झाली. यानंतर काल शिंदे दिल्लीला गेले होते. तिथे त्यांनी केंद्रीय मंत्री अमित शहांशी चर्चा केली. यावेळी त्यांच्यासोबत देवेंद्र फडणवीस, अजित पवार उपस्थित होते.
मुख्यमंत्रिपद सोडणाऱ्या शिवसेनेला उपमुख्यमंत्रिपदाची ऑफर आहे. शिंदेंनी उपमुख्यमंत्रिपद व्हावं अशी भाजप नेत्यांची इच्छा आहे. काल झालेल्या बैठकीत शिंदेंनी अमित शहांसमोर त्यांच्या चार प्रमुख मागण्या ठेवल्या. शिवसेनेला कॅबिनेट, राज्यमंत्री अशी मिळून १२ मंत्रिपदं मिळावीत. विधान परिषदेचं सभापतीही शिवसेनेला मिळावं, अशा मागण्या शिंदेंनी शहांसमोर ठेवल्या. महायुती-१ सरकारमध्ये शिवसेनेकडे नऊ मंत्रिपदं होती. या सरकारच्या कालावधीत मंत्रिमंडळातील सदस्य संख्या २८ इतकी होती. ती कमाल ४३ इतकी ठेवता येते.
पालकमंत्रिपदांचं वाटप करताना शिवसेनेचा योग्य सन्मान राखला जावा. खाते वाटपात गृह, नगर विकास विभाग शिवसेनेला मिळावेत, अशाही मागण्या शिंदे यांच्याकडून करण्यात आलेल्या आहेत. नगर विकास खातं याआधी शिंदे यांच्याचकडे राहिलं आहे. पण गृह खातं फडणवीसांनी सांभाळलं आहे. २०१४ ते २०१९ या कालावधीत फडणवीस मुख्यमंत्री होते. तर २०२२ ते २०२४ या कालावधीत फडणवीस उपमुख्यमंत्री राहिले. या दोन्ही कार्यकाळात त्यांनी गृह मंत्रालय स्वत:कडे ठेवलं. गृह मंत्रालय अतिशय महत्त्वाचं मानलं जातं. त्यामुळे भाजप हे खातं शिंदेंसाठी सोडण्याची शक्यता अतिशय कमी आहे.