Eknath Shinde: निकाल लागून आठवडा उलटला असला तरीही महायुतीनं राज्यपालांकडे सत्ता स्थापनेचा दावा केलेला नाही. काळजीवाहू मुख्यमंत्री एकनाथ शिंदेंनी त्यांच्या सगळ्या बैठका रद्द केल्या आहेत.
शिंदे नेमकं काय करणार? ३ शक्यता कोणत्या?
१. उपमुख्यमंत्रिपदासह महत्त्वाची खाती- भाजपकडे मुख्यमंत्री आणि एकनाथ शिंदे, अजित पवारांना उपमुख्यमंत्रिपद अशी रचना पुढील सरकारमध्ये असू शकते. भाजपकडून शिंदेंना तशीच ऑफर आहे. उपमुख्यमंत्रिपद मिळणार असेल तर मग गृह मंत्रालय मिळावं, अशी शिंदेंची मागणी आहे. गृह विभाग महत्त्वाचा असल्यानं या मंत्रालयासह उपमुख्यमंत्रिपद मिळाल्यास शिंदेंना अडचण नसेल. फडणवीस उपमुख्यमंत्री असताना त्यांच्याकडे गृह विभाग होता. त्याच प्रकारे शिंदेंना गृह मंत्रालय मिळावं, असा शिवसेनेचा युक्तिवाद आहे.
२. स्वत:च्या जागी अन्य नेत्याकडे उपमुख्यमंत्रिपद- भाजपनं गृह मंत्रालय सोडण्यास नकार दिल्यास शिंदे स्वत:च्या जागी अन्य नेत्याकडे उपमुख्यमंत्रिपद देऊ शकतात. शिंदेंचे पुत्र श्रीकांत यांच्या नावाची चर्चा या पदासाठी सुरु होती. खुद्द एकनाथ शिंदेंनी काल साधकबाधक चर्चा सुरु असल्याचं विधान केलं होतं. पण श्रीकांत शिंदेंनी आपल्याला कोणत्याही पदाची लालसा नसल्याचं म्हणत उपमुख्यमंत्रिपदाच्या बातम्या तथ्यहीन असल्याचं म्हटलं. सेनेकडून दीपक केसरकर यांचं नाव उपमुख्यमंत्रिपदासाठी चर्चेत आहेत. याशिवाय उदय सामंत, गुलाबराव पाटील, दादा भुसे यांची नावंही चर्चेत आहेत.
३. सरकारला बाहेरुन पाठिंबा- शिंदेंनी शहांना त्यांच्या मागण्यांसंदर्भात तीन प्रस्ताव दिले. त्यातील तिसऱ्या पर्यायात बाहेरुन पाठिंब्याचा उल्लेख आहे. खात्यांबद्दलच्या मागण्या पूर्ण न झाल्यास शिंदे हिंदुत्त्वाच्या मुद्द्यावरुन सरकारला पाठिंबा देऊ शकतात. तसा प्रस्तावच त्यांनी शहांना दिला आहे. यामध्ये थेट दबावाचं राजकारण आहे. शिंदे सरकारबाहेर राहिल्यास त्यांची उपमुख्यमंत्रिपदी पदानवती होणार नाही. पण यामुळे शिंदे भाजपला अडचणीत आणू शकतात. सहकारी पक्षाला भाजपनं सोबत घेतलं नाही, हिंदुत्त्वावादी पक्षासोबत सरकार स्थापन न करता भाजपला राष्ट्रवादी काँग्रेस जवळची वाटली, असा संदेश यातून जाऊ शकतो. त्यामुळे जनमानसात भाजपची प्रतिमा खराब होऊ शकते. आपल्यावर अन्याय झाल्याचं पर्सेप्शन निर्माण करण्याचा प्रयत्न शिंदेंकडून केला जाऊ शकतो.