नाशिक, दि. 2 मे, 2026 (जिमाका वृत्तसेवा): सिंहस्थ कुंभमेळ्याच्या पार्श्वभूमीवर येत्या 6 मे रोजी नाशिक मध्ये कुंभ उद्योग संगम व जिल्हा गुंतवणूक परिषद २०२६ चे आयोजन करण्यात आले आहे. या अनुषंगाने सर्व संबंधित यंत्रणांनी समन्वयातून आवश्यक पूर्वतयारी व काटेकोरपणे नियोजन करावे, असे निर्देश उद्योग विकास आयुक्त तथा उद्योग संचालक दीपेंद्र सिंह कुशवाह यांनी दिले.
जिल्हाधिकारी कार्यालयातील मध्यवर्ती सभागृहात आयोजित बैठकीत आयुक्त श्री. कुशवाह बोलत होते. यावेळी सिंहस्थ कुंभमेळा विकास प्राधिकरणाचे आयुक्त शेखर सिंह, जिल्हाधिकारी आयुष प्रसाद, जिल्हा उद्योग केंद्राचे महाव्यवस्थापक नाशिक चेतन पाटील, अहिल्यानगरचे दीपक शिवदास, नंदूरबारचे निलेश गायकवाड, नाशिक महानगरपालिकेचे अतिरिक्त आयुक्त अमित रंजन, जिल्हा उद्योग केंद्राच्या सहसंचालक वैशाली सोने, कुंभमेळा प्राधिकरणाचे अतिरिक्त आयुक्त कमलाकर रणदिवे, औद्योगिक विकास महामंडळाचे प्रादेशिक व्यवस्थापक दीपक पाटील, उद्योजकता विभागाचे व्यवस्थापक आर. एस. साखरे, जिल्हा उद्योग केंद्राचे व्यवस्थापक प्रशांत पाटील, क्षेत्र अधिकारी मनीष महाजन, कुंभमेळा प्राधिकरणाचे तहसीलदार योगेश चंद्रे यांच्यासह अधिकारी उपस्थित होते.
गुंतवणूक परिषद नाशिक जिल्ह्याच्या औद्योगिक प्रगतीसाठी महत्त्वपूर्ण असून, गुंतवणूकदारांना आकर्षित करण्यासाठी सकारात्मक वातावरण निर्माण करणे सर्व यंत्रणांची सामूहिक जबाबदारी आहे. त्यामुळे नवउद्योजक व उद्योग क्षेत्रातील गुंतवणूकदार यांना याबाबत कळविण्यात येवून सहभागासाठी उद्युक्त करावे. प्रत्येक विभागाने आपापल्या जबाबदाऱ्या प्राधान्याने पार पाडून कार्यक्रम यशस्वी करावा असे आवाहनही त्यांनी केले. या परिषदेद्वारे नाशिकला औद्योगिक नकाशावर अधिक ठळक स्थान मिळेल, असा विश्वासही त्यांनी यावेळी व्यक्त केला.
सिंहस्थ कुंभमेळ्यानिमित्त नाशिक शहरात मोठ्या प्रमाणात पायाभूत सुविधा निर्माण होत असल्याने गुंतवणूकदारांना जिल्ह्यात गुंतवणूकीसाठी मोठी संधी निर्माण होणार असल्याचे कुंभमेळा आयुक्त शेखर सिंह यांनी सांगितले तर जिल्ह्यातील वातावरण उद्योगस्नेही असल्याने भविष्यात उद्योग आणि गुंतवणूकदारांचा ओघ नाशिकमध्ये वाढणार असून यासाठी ही परिषद महत्त्वपूर्ण ठरणार असल्याचे जिल्हाधिकारी आयुष प्रसाद यांनी सांगितले.
000000