अवैध अग्निशस्त्र बाळगणाऱ्या एका आरोपीला अटक करत मोठी कारवाई

Crime News -परवेज शेख पुण्यातील भारती विद्यापीठ पोलिसांनी अवैध अग्निशस्त्र बाळगणाऱ्या एका आरोपीला अटक करत मोठी कारवाई केली आहे. २९ जुलै २०२६ रोजी वरिष्ठ पोलीस निरीक्षक मानसिंग पाटील यांच्या मार्गदर्शनाखाली पोलीस उपनिरीक्षक निलेश मोकाशी व त्यांच्या तपास पथकाचे पेट्रोलिंग सुरू असताना गोपनीय माहिती मिळाली की, भिलारेवाडी येथील महानंद डेअरीजवळ एक इसम पिस्टलसह थांबला आहे. माहितीची खातरजमा करत पोलिसांनी तत्काळ सापळा रचला आणि विशाल प्रल्हाद कलवले, वय २६ वर्षे, याला ताब्यात घेतले. झडतीदरम्यान त्याच्याकडून सुमारे ५० हजार रुपये किमतीचे गावठी बनावटीचे पिस्टल आणि एक हजार रुपये किमतीचे एक जिवंत काडतूस जप्त करण्यात आले. या प्रकरणी भारती विद्यापीठ पोलीस ठाण्यात गुन्हा क्रमांक ३९३/२०२६ दाखल करण्यात आला असून भारतीय हत्यार अधिनियम आणि महाराष्ट्र पोलीस अधिनियमांतर्गत कारवाई करण्यात आली आहे. या गुन्ह्याचा पुढील तपास पोलीस उपनिरीक्षक निलेश मोकाशी करत आहेत. ही यशस्वी कारवाई पोलीस उपआयुक्त मिलिंद मोहिते, सहाय्यक पोलीस आयुक्त राहुल आवारे यांच्या मार्गदर्शनाखाली वरिष्ठ पोलीस निरीक्षक मानसिंग पाटील, पोलीस निरीक्षक कैलास कोडग आणि भारती विद्यापीठ पोलीस स्टेशनच्या तपास पथकाने केली आहे.