फटाका सायलेन्सरचा दहशतीचा खेळ संपला; ११ दुचाकी जप्त, चालकांवर गुन्हे दाखल / ११ दुचाकी जप्त, १६ जणांवर गुन्हे; मॉडिफाईड सायलेन्सर बसविणाऱ्या गॅरेज चालकांवरही कारवाई पुणे | पपरवेज शेख पुणे शहरातील सर्वाधिक काळेपडळ पोलीस ठाण्याच्या हद्दीत मध्यरात्री बुलेट व इतर दुचाकींना मॉडिफाईड ‘फटाका सायलेन्सर’ लावून कर्णकर्कश आवाज करत नागरिकांमध्ये दहशत निर्माण करणाऱ्या तरुणांविरुद्ध काळेपडळ पोलिसांनी मोठी कारवाई केली आहे. या कारवाईत ११ दुचाकी जप्त करण्यात आल्या असून १६ जणांविरुद्ध गुन्हे दाखल करण्यात आले आहेत. ३१ जुलैच्या रात्री ११ ते १ ऑगस्टच्या पहाटे ५ वाजेपर्यंत कडनगर चौक, न्याती चौक, रहेस्टा विस्टा, उंड्री आणि महंमदवाडी परिसरात अनेक दुचाकीस्वारांनी मॉडिफाईड सायलेन्सरचा फटाक्यासारखा आवाज करत भरधाव आणि धोकादायक पद्धतीने वाहन चालविल्याचे व्हिडिओ सोशल मीडियावर व्हायरल झाले होते. या प्रकारामुळे परिसरातील नागरिक, विशेषतः वृद्ध आणि लहान मुले, घाबरून गेल्याच्या तक्रारी पोलिसांकडे प्राप्त झाल्या. त्यानंतर काळेपडळ पोलिसांनी तांत्रिक तपास आणि गुप्त बातमीदारांच्या मदतीने संबंधित वाहनचालकांचा शोध घेत त्यांना ताब्यात घेतले. आरोपींविरुद्ध भारतीय न्याय संहितेतील संबंधित कलमे तसेच मोटार वाहन कायद्यानुसार गुन्हे दाखल करण्यात आले. या कारवाईदरम्यान जप्त करण्यात आलेल्या सर्व दुचाकींवरील बेकायदेशीर मॉडिफाईड ‘फटाका सायलेन्सर’ काढून नष्ट करण्यात आले. तसेच अशा प्रकारचे सायलेन्सर बसविणाऱ्या तीन गॅरेज चालकांविरुद्धही पोलिसांनी कायदेशीर कारवाई केली आहे. याशिवाय, संबंधित रात्री दहशत निर्माण करणाऱ्या इतर दुचाकीस्वारांचा शोध सुरू असून त्यांच्यावरही कठोर कारवाई करण्यात येणार असल्याचे पोलिसांनी स्पष्ट केले आहे. ही उल्लेखनीय कारवाई पोलीस उपायुक्त (परिमंडळ-६) जीवन बेनिवाल यांच्या मार्गदर्शनाखाली वरिष्ठ पोलीस निरीक्षक गिरीषा निंबाळकर, पोलीस निरीक्षक (गुन्हे) आण्णासो बाबर, सहाय्यक पोलीस निरीक्षक विलास सुतार तसेच काळेपडळ पोलीस स्टेशनच्या विशेष पथकाने यशस्वीरीत्या पार पाडली.