हायलाइट्स:
- अल्पवयीन मुलीवर तिच्याच घरामागे अत्याचार, आई बाहेर आली अन्….
- रात्री ८ वाजता मुलगी घराबाहेर आली तोच नराधमाने पकडलं
- तक्रारीनंतर पोलिसांकडून आरोपी अटकेत
अमरावती : कितीही जनजागृती केली आणि कठोर कायदे केले तरी महिला अत्याचाराच्या घटना काही कमी होण्याचं नाव घेत नाहीयेत. असाच एक भयंकर प्रकार अमरावतीमध्ये समोर आला आहे. अमरावती जिल्ह्यातील खोलापूर पोलीस स्टेशन अंतर्गत १५ वर्षीय अल्पवयीन मुलीवर अत्याचार झाल्याची घटना समोर आली आहे. रात्री ८ वाजता सुमारास घराबाहेर निघाली असता हा धक्कादायक प्रकार घडला. या घटनेमुळे संपूर्ण परिसरात खळबळ उडाली असून नागरिकांमध्ये आणि पालकांमध्ये भीतीचं वातावरण आहे.
मिळालेल्या माहितीनुसार, रात्रीच्या सुमारात पीडित घराबाहेर निघाली असता नराधमाने बळजबरीने तिचा हात पकडून घरामागील जागेत नेत तिच्यावर अत्याचार केले. आधीच रात्र त्यात बराच वेळ होऊनही मुलगी घरी परतली नसल्याने तिच्या आईने शोध घेतला असता या प्रकरणाचा उलगडा झाला.
मुलीच्या आईने तात्काळ खोलापूर पोलीस स्टेशन गाठून या संदर्भात तक्रार दिली. पोलिसांनी आरोपी हरी उर्फ दिवाकर कराळे विरुद्ध पोस्कोसह विविध कलम अंतर्गत गुन्हा दाखल करून आरोपीस अटक केली आहे. या संदर्भात अधिक तपास खोलापूर पोलीस करत आहेत.
दरम्यान, या सर्व प्रकारामुळे अल्पवयीन मुलीच्या मनावर मोठा घात झाला आहे. तिला यातून बाहेर काढण्यासाठी तिचे कुटुंबिय प्रयत्न करत असून तिची आरोग्य चाचणीही करण्यात येणार असल्याची माहिती आहे. इतकंच नाहीतर या घटनेमुळे पालकांमध्ये मोठी भीती आहे. आताच्या तरुणांमध्ये पोलिसांचा धाक नाही. त्यामुळे अशा घटना होत असल्याचं नागरिकांचं म्हणणं आहे.