आरोपी महिला सीमा व तक्रारदार महिला गीता (दोन्ही नावे बदललेली आहेत) या डोंगरी परिसरातील एका इमारतीत एकाच मजल्यावर राहतात. गीता ही आपल्याबाबत आपल्या आईला सर्व सांगत असते, असा सीमाला संशय होता. दोघींची घरे शेजारी-शेजारीच असल्याने सीमा तिच्या घरातूनच गीताला शिव्यांची लाखोली वाहत असायची. १९ सप्टेंबर २०२० रोजी रात्री ८ वाजता सीमाने व्हरांड्यात येऊन मोठमोठ्याने ओरडून गीताबाबत अपशब्द वापरण्यास सुरुवात केली. त्याचा जाब विचारण्यासाठी गीता बाहेर आल्यानंतर सीमाने तिला स्लिपरने मारहाण केली. काहींना तिला थांबवण्याचा प्रयत्न केला. मात्र, सीमाने रागाच्या भरात गीताचा गाऊन फाडत पुन्हा तिच्यावर हल्ला केला. सीमाने सर्वांसमक्ष हा प्रकार केल्याने गीताला लज्जास्पद वाटले आणि तिची तब्येतही बिघडली. नंतर गीताने दिलेल्या तक्रारीप्रमाणे पोलिसांनी सीमाविरोधात भादंविच्या विविध कलमांबरोबरच कलम ३५४ अन्वयेही (हल्ला किंवा फौजदारीपात्र बलप्रयोगाने महिलेचा विनयभंग करणे) गुन्हा दाखल केला.
या प्रकरणी न्यायाधीश मनोज चव्हाण यांच्यासमोर चाललेल्या खटल्यात सरकारी पक्षाने दोन प्रत्यक्षदर्शी शेजाऱ्यांसह अनेकांच्या साक्षी नोंदवल्या. तर ‘केवळ छळवणुकीच्या उद्देशाने माझ्याविरोधात ही तक्रार करण्यात आली असून, प्रत्यक्षदर्शी घटनेच्या वेळी उपस्थितच नव्हते. मी केवळ स्लिपरने मारहाण केली’, असा बचाव आरोपीने करण्याचा प्रयत्न केला. तसेच या घटनेत दोघीही महिला असल्याने कलम ३५४ हे आरोपी महिलेवर लागू होत नाही, असा युक्तिवादही आरोपीच्या वकिलांनी केला. मात्र, ‘आरोपीने फिर्यादीवर हल्ला केल्याचे व तिचा विनयभंग केल्याचे प्रत्यशदर्शींच्या साक्षींतून सिद्ध होत आहे. तसेच एखादी महिला ही अन्य महिलेवर पुरुषाप्रमाणेच फौजदारी बलप्रयोगाचा वापर करू शकते आणि जाणीवपूर्वक महिलेचा विनयभंगही करू शकते. कृतीचा हेतू महत्त्वाचा ठरतो. त्यामुळे केवळ ती महिला आहे म्हणून तिला कलम ३५४ लागू होत नाही, असे नाही,’ असा निष्कर्ष नोंदवत न्या. चव्हाण यांनी आरोपीला दोषी ठरवले आणि तिला एक वर्षाच्या सश्रम तुरुंगावासाची शिक्षा ठोठावली.
दोघींची तुफान हाणामारी, झटापटीत एकीचा गाऊन फाटला, महिलेवर दाखल झाला विनयभंगाचा गुन्हा
म. टा. विशेष प्रतिनिधी, मुंबईः ‘भारतीय दंड विधानाच्या कलम ३५४अन्वये असलेला गुन्हा हा लैंगिक स्वरूपाचाच असायला हवा, असे गरजेचे नाही. फौजदारीपात्र बलप्रयोग व हल्ला या प्रकारात कलम ३५४खालील गुन्हा मोडतो. महिलेचा विनयभंग करण्याच्या हेतूने तो पुरुष किंवा महिलेकडूनही होऊ शकतो. त्यामुळे विनयभंगाच्या गुन्ह्याबद्दल केवळ पुरुषच नव्हे, तर महिलेलाही दोषी ठरवले जाऊ शकते,’ असा महत्त्वाचा निर्णय देत माझगाव न्यायदंडाधिकारी न्यायालयाने आरोपी महिलेला नुकतीच एक वर्षाची शिक्षा ठोठावली.