मुंबई: कायम वर्दळ असणाऱ्या पूर्व द्रुतगती महामार्ग अर्थात ईस्टर्न एक्स्प्रेस वे मार्गावर मंगळवारी सकाळपासून मोठी वाहतूक कोंडी पाहायला मिळत आहे. या मार्गावरील विक्रोळी परिसरात सध्या मेट्रो प्रकल्पाचे (Mumbai Metro) काम वेगात सुरु आहे. आज सकाळपासून याठिकाणी मेट्रोच्या एका गर्डरचे लाँचिंग सुरु होते. त्यामुळे सकाळच्या वेळेत कमी गर्दी असूनही या मार्गावरील वाहतूक संथगतीने सुरु होती. त्यानंतर पिक अवर्स सुरु होऊनही हे काम संपले नव्हते. या कामाला अपेक्षेपेक्षा जास्त वेळ लागला. त्यामुळे गर्दी वाढल्यानंतर ईस्टर्न एक्स्प्रेस वे वर वाहतूक कोंडी वाढत गेली. परिणामी विक्रोळी ते ठाणे या पट्ट्यातील वाहतूक अत्यंत संथ झाली. जवळपास एक ते दीड किलोमीटर अंतरापर्यंत वाहनांच्या रांगा पाहायला मिळत होत्या.

काहीवेळापूर्वीच मेट्रोच्या गर्डरचे काम पूर्ण झाले आहे. मात्र, गेल्या काही तासांमध्ये ईस्टर्न एक्स्प्रेस वेवर प्रचंड वाहतूक कोंडी झाली आहे. त्यामुळे ही वाहतूक सुरळीत होण्यासाठी आणखी अनेक तास जाणार आहे. परिणामी आणखी काही तास या मार्गावर वाहतूक कोंडी राहणार आहे. आज महापरिनिर्वाण दिनानिमित्त मुंबईतील चैत्यभूमीकडे जाणाऱ्या आंबेडकरी अनुयायांची संख्याही मोठी आहे. त्यामुळे या मार्गावरील वाहतुकीचा ताण आणखीनच वाढला आहे. अशातच मोठी वाहतूक कोंडी झाल्याने मुंबईकडे निघालेल्या चाकरमन्यांना आणि सामान्य प्रवाशांना मनस्ताप सहन करावा लागत आहे.