नगर-पाथर्डी-शेवगाव रस्ता, नगर-राहुरी-कोपरगाव रस्ता, नगर-मिरजगाव-टेंभुर्णी या रस्त्याची प्रचंड दुरवस्था झाली आहे. या रस्त्यांच्या दुरुस्तीसाठी वेळोवेळी आंदोलने करूनही संबंधित प्रशासन याकडे दुर्लक्ष करत असल्याचा आरोप करत हे आंदोलन सुरू करण्यात आले. शेकडो लोकांचे बळी गेले आहेत. त्यामुळे या उपोषण आंदोलनाला काँग्रेस, मनसे, शिवसेना, वंचित बहुजन आघाडीसह इतर पक्षाने पाठींबा दिलाय.
जिल्ह्यातील रखडलेल्या विविध महामार्गासाठी आपण पाठपुरावा केला, मार्चपर्यंत या रस्त्याचे काम सुरू होणार असल्याचे खासदार सुजय विखे पाटील यांनी फेसबुकच्या माध्यमातून सांगितले होते. यावरून आंदोलन करणाऱ्यांवर त्यांनी टीकाही केली होती, त्यावर आपल्याला बोलायचं नाही. जोपर्यंत या रस्त्याचे कामं प्रत्येक्षात सुरू होत नाही तोपर्यंत आपण उपोषण सोडणार नाही, अशी भूमिका आमदार निलेश लंके यांनी घेतली आहे.
वाचा- कोण आहे मेहदी हसन? आठव्या क्रमांकाच्या फलंदाजाने इतिहास घडवला, झाले २ मोठे विक्रम
पाठिंब्यासाठी भाजप विरोधक एकवटले
नीलेश लंके यांचे हे आंदोलन भाजपचे खासदार डॉ. सुजय विखे पाटील यांच्या विरोधातच आहे. त्यामुळे आमदार लंके उपोषणाला बसताच राष्ट्रवादी काँग्रेसह महाविकास आघाडीतील घटक पक्षातील नेते कार्यकर्ते, यासोबतच आम आदमी पार्टी, वंचित बहुजन आघाडी एवढेच नव्हे तर पारनेर तालुक्यातील महाराष्ट्र नव निर्माण सेनेच्या पदाधिकाऱ्यांनीही उपोषणाला पाठिंबा दिला आहे. गेल्या काही काळापासून लंके यांना नगर लोकसभा मतदारसंघातील राष्ट्रवादीचे संभाव्य उमेदवार म्हणून पाहिले जात आहेत. लंके यांनीही पारनेर बाहेरच्या या प्रश्नावर आंदोलनाच्या निमित्ताने सर्वांना एकत्र आणून जणू शक्तिप्रदर्शनच केले आहे.
लंके म्हणाले, हे महामार्ग खराब झाल्याने अपघातात अनेक निष्पाप नागरिकांना आपले जीव गमवावे लागले आहेत. याबाबत आजपर्यंत कोणीही गांभीर्यपूर्वक दखल घेतलेली नाही. सर्वसामान्य नागरिक रोज माझ्याकडे याबाबत तक्रारी करत आहेत. सामान्य नागरिकांचा लोकप्रतिनिधी या नात्याने काहीच कार्यवाही करू शकलो नाही याची मला खंत वाटते. स्थानिक लोकप्रतिनीधींना मग्रूर अधिकारी टोलवा टोलवीची उत्तरे देतात. राष्ट्रीय महामार्ग विभागाचे मुख्य अधिकारी यांच्याशी पत्रव्यवहार करूनही काहीच कार्यवाही होत नसल्याने हे उपोषण करीत आहे, असे लंके यांनी सांगितले.
वाचा- Video: बोल्ड कसं घ्यायचे हे बघून घ्या; सिराज, उमरानची वादळी गोलंदाजी, सुंदरने संधी…
दरम्यान, लंके यांनी उपोषणाचा इशारा दिल्यानंतर खासदार डॉ. सुजय विखे पाटील यांनी या महामार्गांच्या कामासाठी त्यांच्याकडून सुरू असलेल्या पाठपुराव्याची सविस्तर माहिती सोशल मीडियात शेअर केली आहे. त्यानुसार दुरूस्तीचे काम लवकरच सुरू होणार असल्याचे त्यात म्हटले आहे.
गेल्या अनेक दिवसांपासून या प्रश्नावर लोकांच्या तक्रारी आहेत. ठिकठिकाणी आंदोलनेही झाली आहेत. काही ठिकाणी लोकप्रतिनिधीही यातसहभागी झाले. या सर्वच रस्त्यांच्या दुरावस्थेची चर्चा सुरू आहे. मात्र, आता आमदार लंके यांनी यासाठी आक्रमक पवित्रा घेतला. विशेष म्हणजे आपल्या विधानसभा मतदारसंघाच्या बाहेरी काही प्रश्नांचा यामध्ये समावेश आहे. त्यांनी पुढाकार घेतल्यानंत एरवी याकडे दुर्लक्ष करणारे अनेक नेतेही पाठिंबा देण्यासाठी आल्याचे दिसून आले.
वाचा- IND vs BAN: भारताने मालिका तर गमावलीच आणि रोहित शर्माच्या नावावर झाला नकोसा विक्रम
उपोषणस्थळी भजनाचे आयोजन
उपोषण स्थळावर भजनाचे आयोजन करण्यात आले आहे. दरम्यान उद्या पाथर्डी, शेवगाव, पारनेर तालुक्यातील गाव बंद ठेवण्यात येणार असल्याची माहिती देण्यात आलीय, तर आंदोलनाला पाठींबा देण्यासाठी चक्का जाम आंदोलन देखील केली जाणार आहे. आंदोलनस्थळी राष्ट्रीय महामार्ग प्राधिकरणाच्या काही अधिकाऱ्यांनी चर्चा केली मात्र, संबंधित अधिकाऱ्यांकडे निर्णय घेण्याचे अधिकार नसल्याने सक्षम अधिकाऱ्यांना चर्चा करण्यासाठी बोलवा असे आमदार लंके यांनी म्हटले आहे. सोबतच ज्या रस्त्याची दुरावस्था झाली त्याचे काम सुरू होत नाही तोपर्यंत उपोषण मागे न घेण्याची भूमिका आमदार लंके यांनी घेतली आहे.