मुंबई : शहरातील खेरवाडी पोलीस ठाण्याच्या स्टोअर्स रूममध्ये ठेवण्यात आलेल्या सिलेंडरचा भीषण स्फोट झाल्याची घटना घडली आहे. या स्फोटात दोन पोलीस कर्मचारी गंभीरीरित्या जखमी झाले असून त्यांना तात्काळ खाजगी रुग्णालयात उपचारासाठी दाखल करण्यात आलं आहे. पोलीस ठाण्यात घडलेल्या या घटनेनं परिसरात खळबळ उडाली.
मिळालेल्या माहितीनुसार, वांद्रे पूर्व सरकारी वसाहत या ठिकाणी खेरवाडी पोलीस ठाणे आहे. पोलिसांकडून अवैधरित्या उभारण्यात आलेल्या खाद्यपदार्थांच्या गाड्यांवर कारवाई केली जाते. अशाच एका खाद्यपदार्थ गाड्यावर कारवाई करण्यात आल्यानंतर जप्त करण्यात आलेल्या वस्तूपैंकी एक सिलेंडर खेरवाडी पोलीस ठाण्यातील स्टोअर्स रूममध्ये ठेवण्यात आला होता. याच सिलेंडरचा आज दुपारच्या सुमारास स्फोट झाला.
सिलेंडरच्या स्फोटावेळी पोलीस ठाण्यात असलेले दोन पोलीस कर्मचारी गंभीररित्या जखमी झाले आहेत. या कर्मचाऱ्यांवर सध्या उपचार सुरू आहेत.
दरम्यान, या स्फोटाची माहिती मिळाल्यानंतर अग्निशमन दलाच्या गाड्या घटनास्थळी दाखल झाल्या असून परिस्थिती नियंत्रण आणण्यात येत आहे.