राहुल शेवाळे यांनी केलेल्या आरोपांविषयी विचारेलल्या प्रश्नावर बोलताना संजय राऊत म्हणाले की, ‘हे शेवाळे म्हणजे काय अॅटर्नी जनरल आहेत का? २०२४ ला ते देशाच्या संसदेतही दिसणार नाहीत. त्यामुळे तुम्ही मला त्यांच्याविषयी सांगू नका,’ अशा शब्दांत राऊत यांनी खासदार शेवाळेंना फटकारलं आहे.
काय होता शेवाळे यांचा आरोप?
‘अभिनेता सुशांतसिंह याच्या मृत्यूपूर्वी अभिनेत्री रिया चक्रवर्ती हिच्या मोबाइलवर ४० हून अधिक फोन आले होते. हा नंबर AU या नावाने तिच्या मोबाइलमध्ये सेव्ह होता. AU म्हणजे आदित्य उद्धव ठाकरे असा त्याचा अर्थ होता,’ असा धक्कादायक दावा करत राहुल शेवाळे यांनी बुधवारी राजकीय खळबळ उडवून दिली होती.
आदित्य ठाकरे यांचं उत्तर
सुशांतसिंह राजपूत याच्या मृत्यू प्रकरणावरून अधिवेशनात गदारोळ झाल्यानंतर आदित्य ठाकरे यांनी प्रत्युत्तर दिलं. ‘राज्यातील खोके सरकारला ३२ वर्षांच्या तरुणाने हलवून ठेवलं आहे, हे आजच्या प्रकारावरून दिसून आलं. सभागृहात सत्ताधारीच येऊन आंदोलन करतात, असे मी गेल्या अडीच वर्षांत कधीही पाहिले नाही. आम्ही राज्यपाल हटाव ही मागणी सतत करत आहोत. महापुरुषांचा अपमान करणाऱ्या राज्यपालांना वाचवण्यासाठी, मुख्यमंत्र्यांना वाचवण्यासाठी हा प्रयत्न सुरू आहे. मुख्यमंत्र्यांविरोधात आम्ही एनआयटी घोटाळा उघडकीस आणला आहे. सभागृहात यावर चर्चाच होऊ नये, यासाठी हा मुद्दा उकरून काढला जात आहे’, असंही ते म्हणाले.