विवाहित महिला, तिचा मुलगा आणि एक साथीदार अशा तिघांना पारगाव पोलिसांनी मंचर येथे अटक केली. तसेच इतर तीन आरोपींचा पोलीस शोध घेत आहेत. लता अविनाश कोटलवार ( वय ५१ ), मनोज अविनाश कोटलवार ( वय २४, दोघेही रा. सध्या रा. इंदिरानगर, आळंदी, ता. खेड. मूळ रा. नांदेड ), यास्मीन अन्वर बेग ( वय २७, रा. दीप बंगला चौक, शिवाजीनगर पुणे ) यांना पोलिसांनी अटक केली आहे.
याबाबत पोलिसांनी दिलेली माहिती अशी की, आंबेगाव तालुक्यातील पारगाव परिसरात गणेश खंडू बांगर (वय २९ रा. भराडी, ता. आंबेगाव) याचा विवाह करायचा असल्याने त्याचे वडील त्याच्यासाठी मुलगी शोधत होते. त्यामुळे त्यांनी नातेवाइकांना याबाबत कल्पना देऊन ठेवली होती. वसंत किसन थोरात (रा. मंचर) यांना मुलगी पाहण्यास सांगितले होते. त्यामुळे ओळखीचे असलेले वसंत थोरात हे मुलाच्या घरी मागणे घेऊन आले. त्यांच्यासोबत एक पुरुष व तीन महिला देखील आल्या होत्या. गणपत हाबू वाळुंज, मुलगी शितल रमेश खुडे, मुलीची मावशी लता अविनाश कोटलवार आणि वैशाली मोरे अशी सदर व्यक्तींनी आपली ओळख करून दिली.
घरात लग्नाबाबत बैठक सुरू असताना मुलीची मावशी असलेल्या महिलेने मुलीला आई-वडील नसून तिचा सांभाळ मी करत आहे. तसेच ती अविवाहित असल्याचे सांगितले. वसंत थोरात यांनी लग्न जमवण्यासाठी दीड लाख रुपये देण्याची मागणी केली. आपल्या मुलाचे लग्न होत नसल्याने तरुणाचे वडील खंडू बांगर यांनीही तेवढी रक्कम देण्याचे कबूल केले. लग्नाची चर्चा झाल्यानंतर गणपत वाळूज यांनी उद्या अमावस्या असून नंतर पौष महिना चालू होत आहे. त्यामुळे लग्न आजच उरकून घेऊ, असं म्हणत त्याच दिवशी संध्याकाळी मुलगी शितल व गणेश यांचा घरातच हार घालून विवाह लावून दिला.
लग्न झाल्यानंतर पती गणेश याला पत्नीच्या वागण्याचा आणि बोलण्याचा संशय येऊ लागला. तिचा पहिला विवाह झालेला असावा व तिला मुलेही असावी असा अंदाज त्याने बांधला. तसेच पत्नी शितलही गणेशच्या मोबाईलवरून बाहेर जाऊन तिची मावशी व इतरांशी बोलत असायची. गणेशच्या संशयात भर पडल्याने त्याने त्याच्या मोबाईलमध्ये कॉल रेकॉर्डर सुरू करून ठेवला. त्यावरून शितलचे पहिले लग्न झाले असून तिला मुले असल्याचे समजले आणि तिचे बिंग फुटले.
दरम्यान, आपल्यासोबत लग्नाचा बनाव झाला असून सदर तरुणी आपल्या घरातील दागिने आणि पैसे पळून घेऊन जाण्याच्या तयारीत असल्याचे गणेशच्या लक्षात आले. त्यामुळे गणेश आणि त्याच्या कुटुंबियांनी तात्काळ पोलीस ठाण्यात धाव घेत तक्रार दाखल केली. पोलिसांनी घटनेचे गांभीर्य लक्षत घेत गुन्हा दखल करत आरोपींचा पाठलाग करत त्यांना मंचर येथून ताब्यात घेतले. पोलिसांनी शिलत खुडेकडे अधिक तपास केला असता तिचे खरे नाव यास्मीन अन्वर बेग (वय २७, रा. शिवाजीनगर, पुणे) असं सांगितलं. याप्रकरणी पोलीस अधिक तपास करत आहेत.