नागपूर : केंद्रीय मंत्री नितीन गडकरी यांना धमकीचा फोन आलेला आहे. अंडरवर्ल्ड डॉन दाऊदच्या नावाने जीवे मारण्याची धमकी त्यांना आलेली आहे. आम्हाला खंडणी द्या नाहीतर तुमच्या जीवाचं काही खरं नाही, असं त्यांना फोनवरुन सांगण्यात आलं. गडकरींच्या नागपूरमधील जनसंपर्क कार्यालयात धमकीचा फोन आल्याची माहिती आहे.
नागपूरमधील ऑरेंज सिटी रुग्णालयाजवळ नितीन गडकरी यांचं संपर्क कार्यालय आहे. आज सकाळपासून तीन वेळा गडकरी यांच्या कार्यालयात दाऊदच्या नावाने फोन आले. साडे अकरा वाजता दोन फोन आणि १२ वाजून ३२ मिनिटांनी गडकरींना जीवे मारण्याची धमकी संबंधित फोनमधून देण्यात आली. यावेळी फोन करणाऱ्याने खंडणीची मागणी केली. ‘एबीपी माझा’ने हे वृत्त दिलं आहे.
नागपूरमधील ऑरेंज सिटी रुग्णालयाजवळ नितीन गडकरी यांचं संपर्क कार्यालय आहे. आज सकाळपासून तीन वेळा गडकरी यांच्या कार्यालयात दाऊदच्या नावाने फोन आले. साडे अकरा वाजता दोन फोन आणि १२ वाजून ३२ मिनिटांनी गडकरींना जीवे मारण्याची धमकी संबंधित फोनमधून देण्यात आली. यावेळी फोन करणाऱ्याने खंडणीची मागणी केली. ‘एबीपी माझा’ने हे वृत्त दिलं आहे.
गडकरींच्या नागपूरमधील जनसंपर्क कार्यालयातील काम करणाऱ्या कर्मचाऱ्याने दिलेल्या माहितीनुसार फोन करणारा व्यक्ती खंडणीची मागणी करत होता. जर खंडणी दिली नाही तर गडकरींना जिवानिशी मारु, अशी धमकी सदर व्यक्तीने फोनवरुन दिली. यावेळी त्याने दाऊदचं नाव घेतलं.
धमकीच्या फोननंतर गडकरींच्या कार्यालयाने या प्रकरणाची सगळी माहिती नागपूरच्या वरिष्ठ पोलीस अधिकाऱ्यांना दिली आहे. नागपूरच्या सायबर सेलने तत्काळ तपासही सुरु केला आहे. कॉल नेमके कुठून आले होते, कॉल करणाऱ्याचा उद्देश नेमका काय होता, याचा तपास सायबर पोलीस करत आहेत.
दरम्यान, केंद्रीय मंत्री नितीन गडकरी हे देखील आज नागपुरातच असल्याची माहिती आहे. नागपूरमधीलच एका कार्यक्रमात आज दुपारी ते सहभागी झालेले आहेत. सकाळी आलेल्या धमकीच्या फोननंतर त्यांच्या सुरक्षा व्यवस्थेत वाढ करण्यात आलेली आहे.