अचानक झालेल्या हल्ल्यामुळे अपक्ष उमेदवार विकेश गोकुल गवाले काही वेळ घाबरलेले होते. स्वतःची सुटका करुन घेत ते वाहनाने माहुली जहागीर येथे पोहचले. तेथील काही नागरिकांनी त्यांना लगेच प्राथमिक आरोग्य केंद्रात दाखल केले. या घटनेने एकच खळबळ उडाली असून नातेवाईकांनी रुग्णालयावर धडक देत घटनेचा निषेध केला.
विकेश गवाले हे अमरावती येथील खासगी बँकेत नोकरीला आहेत. रहाटगाव येथील वृंदावन अपार्टमेंट येथे ते वास्तव्यास आहेत. अमरावती पदवीधर निवडणुकीमध्ये ते अपक्ष उमेदवार म्हणून रिंगणात उतरले आहेत.
आज सकाळी ९ वाजताच्या सुमारास चारचाकी वाहन क्र. एम.एच.२७ डी.ई. ६३९१ ने ते मोर्शी येथे प्रचारासाठी जात होते. यावेळी त्यांना माहुली जहागीरपुढे रेल्वे पुलाजवळ चार अज्ञात इसमांनी हात दाखवून वाहन थांबवले. यावेळी पाठिंबा देण्यावरून त्यांच्यात वाद निर्माण झाला. त्यातील एकाने विकेश गवाले यांना मारहाण करायला सुरुवात केली.
हेही वाचा : शरद पवार आणि माझं भांडण जुनं, पण भविष्यात एकत्र येऊ ही अपेक्षा: प्रकाश आंबेडकर
गवाले यांनी तातडीने वाहन सुरू करून घटनास्थळावरून पळ काढला. जीव वाचवत वाहन माहुलीच्या दिशेने वळवले. माहुलीच्या बस स्टँडवर येताच त्यांनी नागरिकांना घटनाक्रम सांगितला. नागरिकांनी लगेच त्यांना माहुली येथील प्राथमिक आरोग्य केंद्रात दाखल केले. माहुली येथील आरोग्य केंद्रात त्यांचेवर प्राथमिक उपचार करून त्यांना अमरावतीच्या जिल्हा सामान्य रुग्णालयात दाखल करण्यात आले. घटनेची माहिती माहुली जहागीर पोलिसांना देण्यात आली, मात्र पोलिस तासभर घटनास्थळी तसेच रुग्णालयात पोहचले नसल्याने नातेवाईकांनी पोलीस स्टेशन गाठून लेखी तक्रार दिली.
हेही वाचा : मुख्यमंत्र्यांवर आरोप करणाऱ्या बाबाजानी दुर्राणींनाच शिंदे गटात यायचं आहे; सईद खान यांचा मोठा खुलासा