सातारा : साताऱ्यात महामार्गानजीक असलेल्या वाढे फाटा परिसरातील हॉटेलजवळ एका व्यक्तीवर गोळीबार करुन त्याची हत्या करण्यात आली आहे. ही घटना रात्री १ ते दीड वाजण्याच्या सुमारास घडली असल्याचं सांगण्यात येत आहे. अमित भोसले असं खून झालेल्या व्यक्तीचे नाव असल्याचे समजते. ते शहरातील शुक्रवार पेठेतील रहिवासी आहेत.
मिळालेल्या माहितीनुसार, वाढे फाट्याच्या एका टपरीजवळ गाडीत बसून नाष्टा केल्यानंतर हात धुवत असताना दोन हल्लेखोरांनी अमित भोसले यांच्या डोक्यात गोळ्या झाडल्या. अमित यांच्यावर हल्लेखोरांनी एकूण चार गोळ्या झाडल्याचं पोलिसांनी सांगितलं आहे. घटनेची माहिती मिळताच सातारा तालुका पोलिसांनी तात्काळ घटनास्थळी धाव घेतली. चार गोळ्या झाडल्या गेल्याने रक्ताच्या थारोळ्यात पडलेल्या अमित भोसले यांचा जागीच मृत्यू झाला.
अमित भोसले यांचा जुन्या गाड्या खरेदी-विक्रीचा व्यवसाय असल्याची माहिती आहे. मात्र हल्लेखोरांनी त्यांचा खून का केला, याबाबतची माहिती अद्याप समोर आलेली नाही.
दरम्यान, पोलिसांनी घटनेचा पंचनामा केला असून सातारा पोलिसांची १० शोधपथके हल्लेखोरांना पकडण्यासाठी रवाना झाली आहेत.