अहमदगनरमध्ये आजीच्या चहाचा मायेचा गोडवा, लेकाच्या संसाराला अनोखा हातभार

अहमदनगर : सध्या सगळीकडेच गुलाबी थंडी जाणवतेय. अशा थंडीत आपल्याला आवर्जून काही हवं असेल तर ती गोष्ट म्हणजे चहा. अनेकांना झोपेतून उठल्यानंतरही सर्वात आधी कडक चहा हवा असतो. अशीच कडक चव अहमदनगर मनमाड रस्त्यावर असणाऱ्या आजींच्या आरोग्यदायी चहाची आहे. सावेडी नाका इथे हा आजीचा चहा प्रसिद्ध आहे. हा चहा पिण्यासाठी परिसरातील लोक तर येतातच, पण या महामार्गावरून जाणारे लोक सुद्धा आजीच्या हातचा चहा पिण्यासाठी आवर्जून इथे थांबतात. नगरसारख्या शहरात चहाचे अनेक ब्रँड आणि दुकानं आपल्याला पाहायला मिळतात. प्रत्येक ब्रँडने आपल्या वेगवेगळ्या शाखाही उघडल्या आहेत. मात्र प्रत्येक चहाची आपली एक वेगळीच चव आहे. अशीच आगळी वेगळी चव या आजीच्या हातच्या चहाला आहे.या आजींच्या चहाचं वैशिष्ट्य म्हणजे गवती चहा, आलं, वेलची, दूध आणि मसाला टाकून केलेला चहा. हे सगळे पदार्थ टाकून गरमागरम केलेल्या कडक चहाचा असा सुगंध येतो की अनेकजण इथे चहा पिण्यासाठी आवर्जून थांबतात.

नगर मनमाड रोडवर असलेल्या छोट्या खानी हात गाडीवर बाळूबाई गायकवाड यांनी ‘आजीचा चहा’ नावाने चहाचं हे दुकान सुरू केलं आहे. हा चहा आजी स्वतः बनवतात. त्यांच्या या कामात त्यांचा नातू मात्र सावलीसारखा त्यांच्या पाठीशी उभा असतो. या आजींना दोन मुलं असून त्यांचा धाकटा मुलगा रिक्षा चालवतो. मात्र महागाईच्या काळात त्याच्या पगारावर घर खर्च भागत नसल्याने मुलाच्या प्रपंचाला हातभार लावण्यासाठी आजींनी स्वतःचं पुढाकार घेत एक छोटासा व्यवसाय चालू करण्याचं ठरवलं आणि त्यातूनच या आजीच्या चहाचा उदय झाला.

आज या आजींचे वय ६७ वर्ष असून या वयातही त्या आपल्या मुलासाठी आणि त्याच्या संसारासाठी दिवसभर चहाच्या स्टॉलवर उभं राहून काम करतात. एकीकडे आजच्या तरुण पिढीला स्वतःसाठी काम करायचा कंटाळा येत असताना दुसरीकडे या आजी वयाच्या ६७ व्या वर्षी दिवसभर न थकता आजच्या तरुणाईलाही लाजवेल इतके कष्ट करतात. लेकाच्या प्रपंचासाठी एवढा खटाटोप हे फक्त एक आईच करू शकते हेच या आजीच्या कष्टाकडे पाहून पाहायला मिळतं.