जे. जे. कला महाविद्यालय, उपयोजित महाविद्यालय आणि वास्तूकला महाविद्यालयाचे अभिमत विद्यापीठात रुपांतरण करण्यासाठी विद्यापीठ अनुदान आयोगाकडून (यूजीसी) तत्त्वतः मंजुरी मिळाली आहे. यूजीसीच्या अटी आणि शर्तींची पूर्तता केल्यानंतर जे. जे. महाविद्यालयाला अभिमत विद्यापीठाचा दर्जा प्राप्त होणार आहे. त्यासाठी राज्य सरकारने गेल्या वर्षी जुलै महिन्यात सल्लागाराची नियुक्ती केली होती. सल्लागाराने बनवून दिलेले प्रस्ताव आणि आराखडे यांची पूर्तता करण्यासाठी, त्याचबरोबर यूजीसीकडून प्राप्त पत्रातील अटींची पूर्तता करून जे. जे. महाविद्यालयाला अभिमत विद्यापीठाचा दर्जा मिळवून देण्यासाठी राज्य सरकारने राष्ट्रीय उच्च स्तर शिक्षा अभियानाचे राज्य प्रकल्प संचालक निपूण विनायक यांच्या अध्यक्षतेखाली १९ सप्टेंबर २०२२ रोजी टास्क फोर्स तयार केला आहे.
अभिमत विद्यापीठाची स्थापना करण्यासाठी राज्य सरकारला आधी कंपनीची स्थापना करावी लागणार आहे. या कंपनीच्या अंतर्गत अभिमत विद्यापीठ सुरू केले जाणार आहे. सद्यस्थितीत टास्क फोर्सकडून कंपनीची स्थापना करण्याची प्रक्रिया सुरू आहे, अशी माहिती सूत्रांनी दिली. कंपनीची नोंदणी प्रक्रिया पूर्ण झाल्यानंतर या कंपनीकडे महाविद्यालयाची सर्व मालमत्ता हस्तांतरीत केली जाईल. त्यानंतर खऱ्या अर्थाने अभिमत विद्यापीठ सुरू होईल. ही प्रक्रिया जलदगतीने पूर्ण करून आगामी २०२३-२०२४ या शैक्षणिक वर्षापासून महाविद्यालयात पाच पदव्युत्तर पदवी अभ्यासक्रम अभिमत विद्यापीठाच्या माध्यमातून सुरू करण्याचे प्रस्तावित आहे, असेही सूत्रांनी नमूद केले.
दरम्यान, जे. जे. कला महाविद्यालयाला अभिमत विद्यापीठाचा दर्जा देण्यासाठी सन २०१७पासून प्रयत्न केले जात आहेत. तत्कालीन राज्य सरकारने जे. जे. कला महाविद्यालयाचे रुपांतरण राज्य विद्यापीठात करण्यासाठी मार्च २०२२मध्ये अभ्यास समिती स्थापन केली होती. ही समिती मागील महिन्यात नव्या सरकारने रद्द केली. त्यामुळे जे. जे. कला महाविद्यालयासह अन्य दोन कला महाविद्यालयांचे अभिमत विद्यापीठात रुपांतरण होण्याचा मार्ग मोकळा झाला आहे.
पहिल्या वर्षी प्रस्तावित अभ्यासक्रम
एमएफए इन कंटेंपररी आर्ट प्रॅक्टिसेस, एम. आर्च इन मेट्रोपोलिटन आर्किटेक्चर, एम. डीईएस इन कम्युनिकेशन अँड एक्सप्रिअन्स डिझाइन, एम. डीईएस इन टायपोग्राफी अँड टाइप डिझाइन, या अभ्यासक्रमांसह एम. एफ. ए. इन आर्ट एज्युकेशन, एम. आर्च इन आर्किटेक्चरल एज्युकेशन, एम. डीईएस इन डिझाइन एज्युकेशन हे अभ्यासक्रम अभिमत विद्यापीठाच्या माध्यमातून सुरू करण्याचे प्रस्तावित आहे.
