Video: चित्रपट तुझा पण माहोल मीच बनवला! शाहरुखच्या ‘पठाण’मध्ये सलमानच्या कॅमिओवर फॅन्स फिदा

मुंबई– बॉलिवूड अभिनेता शाहरुख खान याचा ‘पठाण’ चित्रपट बॉक्स ऑफिसवर धमाकेदार कमाई करत आहे. या चित्रपटाने दुसऱ्या दिवशी ६८ कोटींची कमाई केली असून एका दिवसात एवढी कमाई करणारा हा एकमेव हिंदी चित्रपट ठरला आहे. या चित्रपटात शाहरुख खानसोबत सलमान खानही दिसत आहे. या चित्रपटात सलमान खान टायगरच्या भूमिकेत आहे. त्याच्या काही मिनिटांच्या कॅमिओने मात्र चित्रपटगृहातील माहोलच बदलून गेलेला दिसत आहे. सलमानचे चाहते त्याला शाहरुखसोबत पाहून प्रचंड खुश झाले आहेत. त्या दोघांचे कित्येक व्हिडिओ आणि फोटो सोशल मीडियावर व्हायरल होत आहेत.

‘पठाण’साठी प्रेक्षकांनी चित्रपटगृहाबाहेर तिकिटांसाठी चक्क रांग लावून उभे आहेत. संपूर्ण भारतात या चित्रपटाने तब्बल २०० कोटींच्या वर कमाई केली आहे. परंतु, त्यातही शाहरुखच्या चित्रपटात आणखी एका व्यक्तीची जोरदार चर्चा आहे. तो म्हणजे सलमान खान. सलमानला पाहून शाहरुखचे चाहते प्रचंड उत्साहित होत आहेत. अगदी शिट्ट्या आणि टाळ्यांनी त्याचं स्वागत करत आहेत. सलमानच्या चित्रपटातील एंट्रीचे अनेक व्हिडिओ सोशल मीडियावर व्हायरल होत आहेत ज्यात चाहते थिएटरमध्ये भाईजानला पाहून जोरजोरात ओरडत आहेत. शाहरुखचे चाहतेही सलमानला पाहून आनंदी होत आहेत.

दोन्ही खानांना एकत्र स्क्रिन शेअर करताना पाहणं ही चाहत्यांसाठी एक पर्वणीच आहे. करण-अर्जुनचा तोच जुना सिन परत आला आहे असं चाहते म्हणत आहेत. सलमानच्या अनेक चाहत्यांचं म्हणणं आहे की, शाहरुखच्या चित्रपटापेक्षा सलमानच्या कॅमिओचीच जास्त चर्चा होतेय. ‘पठाण’ला पाहिल्यानंतर चाहते म्हणतायत की, या करण-अर्जुनच्या जोडीला कोणीही हरवू शकत नाही, दोघेही अप्रतिम आहेत. पठाणच्या कलेक्शनबद्दल बोलायचं तर, या चित्रपटाने पहिल्याच दिवशी ५५ कोटींची दमदार ओपनिंग केली आणि हा सर्वाधिक ओपनिंग करणारा बॉलिवूड चित्रपट ठरला. दुसऱ्या दिवशी या चित्रपटाने ६८ कोटींची कमाई केली. तमिळ आणि तेलुगूमध्ये या चित्रपटाने पहिल्या दिवशी २ कोटी आणि दुसऱ्या दिवशी २. ५० कोटींची कमाई केली आहे.