अभियोग्यता चाचणीचे पाच वर्षांनंतर वेळापत्रक, राज्यभरातून लाखो विद्यार्थी प्रतीक्षेत

म. टा. प्रतिनिधी, औरंगाबाद

राज्यात पाच वर्षानंतर शिक्षक अभियोग्यता व बुद्धिमत्ता चाचणीचे (टीएआयटी) वेळापत्रक जाहीर झाले आहे. परीक्षेसाठी ऑनलाइन अर्ज भरण्याची प्रक्रिया मंगळवार ३१ जानेवारीपासून सुरू होत आहे. २२ फेब्रुवारी ते ३ मार्च दरम्यान ऑनलाइन प्रवेश परीक्षा होणार आहे. परीक्षेमुळे शिक्षक भरतीकडे राज्यातील लाखों विद्यार्थ्यांचे लक्ष लागले आहे.

अर्ज भरताना परीक्षार्थींनी इयत्ता दहावी, इयत्ता बारावी, पदविका, पदवी आदी शैक्षणिक व व्यावसायिक पात्रता तसेच दिव्यांगत्व, राखीव प्रवर्गाचे असल्यास त्याबाबतची माहिती मूळ प्रमाणपत्रावरूनच भरावी. स्कॅन केलेला अद्ययावत रंगीत फोटो, स्वाक्षरी, डाव्या हाताच्या अंगठ्याची निशाणी व स्व-हस्ताक्षरातील प्रतिज्ञापत्र ऑनलाइन अर्ज अपलोड करणे आवश्यक आहे. परीक्षेस व पुढील कार्यवाहीसाठी उमेदवारांशी एसएमएस, ई-मेलद्वारे संपर्क होऊ शकतो. त्यामुळे उमेदवारांनी स्वत:चा भ्रमणध्वनी क्रमांक, ई-मेलद्वारे आयडी अचूक द्यावा. ऑनलाइन अर्जासोबत कोणत्याही प्रमाणपत्रांच्या प्रती जोडण्याची आवश्यकता नाही. ऑनलाइन अर्जामध्ये भरलेल्या माहितीत व मूळ प्रमाणपत्रांमध्ये तफावत आढळून आल्यास कोणत्याही स्तरावर उमेदवारी रद्द केली जाईल, असेही परिषदेने स्पष्ट केले. परीक्षेचे माध्यम, अभ्यासक्रम, पात्रता, अर्ज करण्याची कार्यपद्धती व कालावधी याबाबतची अधिसूचना परिषदेच्या वेबसाईटवर उपलब्ध आहे.

दीर्घकाळापासून होती प्रतीक्षा

राज्य शासनाने शिक्षकांची भरती पवित्रपोर्टल संगणकीय प्रणालीद्वारे करण्याचा निर्णय २०१७ मध्ये घेतला होता. त्यानुसार डिसेंबर २०१७ मध्ये ‘टीएआयटी’ परीक्षा महापरिक्षा पोर्टलच्यावतीने ऑनलाइन घेण्यात आली होती. पाच वर्षे परीक्षा घेण्यात आलेली नव्हती. पाच वर्ष परीक्षा न झाल्याने विद्यार्थ्यांमध्ये रोष होता. पात्रताधारकांमध्ये परीक्षेची प्रतीक्षा अनेक वर्षापासून होती. राज्यात टीईटी पात्र विद्यार्थ्यांची संख्या ही मोठी आहे. २०१७ वर्षापासून पन्नास हजारपेक्षा अधिक उमेदवार विद्यार्थी पात्र ठरले. राज्यातील हजारो डीएड, बीएडधारक २०१७ ते २०२१ या कालावधीत झालेल्या केंद्रीय शिक्षक पात्रता परीक्षा उत्तीर्ण आहेत तेदेखील ‘टीएआयटी’ परीक्षेच्या प्रतीक्षेत आहेत.

असे आहे वेळापत्रक..

ऑनलाइन अर्ज भरण्याची कालावधी…. ३१ जानेवारी ते ८ फेब्रुवारी

ऑनलाइन पद्धतीने परीक्षा शुल्क भरणे… ८ फेब्रुवारी २३.५९ वाजेपर्यंत

प्रवेशपत्र ऑनलाइन मिळणे… १५ फेब्रुवारी

ऑनलाइन परीक्षा दिनांक… २२ फेब्रुवारी ते ३ मार्च दरम्यान