मुंबई : छोट्या पडद्यावरील ‘महाराष्ट्राची हास्यजत्रा’ कार्यक्रमातील सर्व कलाकार घराघरात लोकप्रिय झाले आहेत. त्यातील एक कलाकार म्हणजे अभिनेत्री वनिता खरात आहे. वनितानं तिच्या अभिनयानं तसंच तिच्या उत्तम विनोदाच्या टायमिंगमुळे ती खूपच लोकप्रिय झाली आहे. लवकरच आता वनिता खरात तिचा बॉयफ्रेंड समीत लोंढे याच्याबरोबर उद्या म्हणजे २ फेब्रुवारी रोजी विवाहबद्ध होत आहे.
वनिता आणि सुमितच्या घरी लग्नाची लगबग सुरू झाली असून विवाहाच्या आधीच्या विधींना सुरुवात झाली आहे. मंगळवारी वनिताच्या घरी मेंदी सोहळा झाला, त्याचे फोटो तिनं सोशल मीडियावर शेअर केले होते. त्यानंतर तिच्यावर चाहत्यांनी आणि तिच्या सहकलाकारांनी शुभेच्छांचा वर्षाव केला आहे. आज वनिताच्या घरी तिला चुडा भरण्यात आला.वनितानं हिरवा चुडा भरलेल्या हाताचा फोटो तिनं इन्स्टाग्रामव स्टोरीवर शेअर केला आहे. वनितानं शेअर केलेल्या फोटोमध्ये हिरव्या चुड्यानं नववधूचा हात सजलेला दिसत आहे.वनितानं हिरव्या चुड्यामध्ये प्राजक्ता माळीनं तिला लग्नासाठी म्हणून दिलेल्या मोत्याच्या बांगड्या, गहू तोडे, पैलू पाटली घातलेले दिसत आहेत.
दरम्यान, महाराष्ट्राची हास्यजत्रा कार्यक्रमाची सूत्रसंचालिका प्राजक्ता माळी हिनं वनिताला तिच्या ‘प्राजक्तराज’ या ब्रँडचे दागिने लग्नाची भेट म्हणून दिले आहेत. प्राजक्ताचा हा ब्रँड काळाच्या ओघात मागे पडलेले पारंपरिक मराठमोळे दागिने पुन्हा एकदा लोकांसमोर आणले आहेत. ते दागिने प्राजक्तानं वनिताला लग्नात घालण्यासाठी दिले आहेत. त्याचा एक व्हिडिओ दोघींनी सोशल मीडियावर शेअर केला आहे.
वनिताच्या घरी लग्नाची जय्यत तयारी सुरू आहे. तिचा मित्रपरिवार आणि नातेवाईकांच्या उपस्थितीत वनिता-सुमिता विवाहबंधनात अडकणार आहेत. वनिताच्या मेहेंदी कार्यक्रमाला हास्यजत्रेतील कलाकारांनी हजेरी लावली होती. वनिताच्या मेहेंदीचे फोटो सोशल मीडियावर व्हायरल होत आहेत. त्या फोटोंवर वनिताचे सहकलाकार आणि चाहत्यांनी शुभेच्छांचा वर्षाव केला आहे.
वनिताबद्दल सांगायचं तर ‘महाराष्ट्राची हास्यजत्रा’ कार्यक्रमातून वनिता घराघरात पोहोचली आहे. या कार्यक्रमात येण्याआधी वनितानं शाहिद कपूरच्या ‘कबीर सिंग’ सिनेमात काम केलं आहे.त्याचप्रमाणे वनितानं ‘सरला एक कोटी’ सिनेमातही झळकली होती. वनिताचा होणारा नवरा सुमीत लोंढे हा एक व्हिडिओ क्रिएटर आणि ब्लॉगर आहे.